შსს: პოლიციამ მოხეში 14 მოქალაქე დააკავა

დაპირისპირება ადგილობრივებსა და სამართალდამცავებს შორის. ფოტო: "მე–9 არხი"

11 მუსლიმი ადმინისტრაციულ სამართალდარღვევათა კოდექსის 166–ე და 173–ე მუხლებითაა დაკავებული, რაც გულისხმობს წვრილმან ხულიგნობასა და პოლიციის მუშაკისთვის წინააღმდეგობის გაწევას. სამი პირი კი სისხლის სამართლის კოდექსის 353–ე მუხლით, რაც პოლიციის მუშაკისთვის წინააღმდეგობის გაწევას გულისხმობს და ისჯება ჯარიმით ან 2–დან 5 წლამდე თავისუფლების აღკვეთით.

სად გადაიყვანეს დაკავებულები, შინაგან საქმეთა სამინისტროში არ არ საუბრობენ.

შეგახსენებთ, დღეს, 22 ოქტომბერს, დილიდან, მოხეში მშენებლებმა ძველი მეჩეთის შენობის დემონტაჟი განაახლეს. მუშაობა პოლიციის ცოცხალი ჯაჭვის დახმარებით მიმდინარეობდა. პარალელურად, მეჩეთის შენობასთან ადგილობრივი მუსლიმები და ქრისტიანები შეიკრიბნენ, რასაც დაპირისპირება მოჰყვა.

როგორც "სამხრეთის კარიბჭემ" გაარკვია, მუსლიმების გაღიზიანება პოლიციის ალყას მოჰყვა. ერთ–ერთმა მუსლიმმა პოლიიციის მანქანის მინა ჩაამსხვრია, რასაც ადგილობრივებისა და სამართალდამცველების დაპირისპირება მოჰყვა. ამის შემდეგ დააკავეს 14 მოქალაქე.

მოხეში იმყოფება „სამხრეთის კარიბჭე“. თვალი ადევნეთ ვებს, როგორ განვითარდება მოვლენები, "სამხრეთის კარიბჭე" ეტაპობრივად გიამბობთ.

[sknews.ge]