მუსლიმები მშვიდობიან მანიფესტაციას მართავენ

როგორც მუსლიმი მრევლი ამბობს, სამხარეო სამმართველოსთან მშვიდობიანი მანიფესტაცია ერთი საათის განმავლობაში გაგრძელდება.

აქციის მონაწილეები სხვადასხვა შინაარსის ტრანსფარანტებით აპროტესტებენ მოხეში ძველი მეჩეთის შენობაში ბიბლიოთეკის მოწყობის გადაწყვეტილებას და 14 მუსლიმის დაკავებას.

„დავიწყეთ მშვიდობიან მანიფესტაცია, საქართველოში მცხოვრებელმა, და არა მარტო საქართველოში, ყველამ უნდა დაინახოს როგორი ვითარებაა დღეს ჩვენს ქვეყანაში“, – ამბობს ხულოს მუფთი გურამ აბაშიძე.

სამხარეო სამმართველოსთან იმყოფებიან მუსლიმ ქალთა კავშირის წარმომადგენლებიც.

„აჭარის ავტონომია ჩვენია, მუსლიმების, ხელისუფლებამ გვაჩვენოს ზღვარი მუსლიმებსა და ქრისტიანებს შორის, დაგვიბრუნეთ ჩვენი მეჩეთი“, – ამბობს მუსლიმ ქალთა კავშირის თავმჯდომარე ეთერ აბაშიძე.

ამ წუთებში სამხარეო სამმართველოსთან 200–ზე მეტი ადამიანია შეკრებილი, მათ შორის არიან ის დაზარალებული მუსლიმი ქალები, რომლებიც ამბობენ, რომ გუშინ პოლიციასთან შეტაკების შედეგად დაშავდნენ.

შეგახსენებთ, დღეს, 23 ოქტომბერს, დილიდან, სამცხე–ჯავახეთის სამხარეო მთავარი სამმართველოს შენობასთან მუსლიმები აქციას მართავენ და დაკავებულების გათავისუფლებას ითხოვენ. აქცია გუშინ დაიწყო, მუსლიმებმა ღამე სამმართველოსთან გაათენეს. მოხეში ვითარება გუშინ დაიძაბა. მუსლიმებმა ძველი მეჩეთის შენობაში ბიბლიოთეკის გახსნის სამუშაოები გააპროტესტეს, რასაც სამართალდამცავებთან დაპირისპირება მოჰყვა. დაკავებულია 14 მუსლიმი.



[თინათინ ზაზაძე, მანანა სარაშვილი, ახალციხე]