მოხეში დაკავებული 14 მუსლიმიდან 11–ს სასამართლომ 250 ლარი ჯარიმა დააკისრა

ახალციხის რაიონულ სასამართლოში პროცესი 19:00 საათზე დაიწყო და 5 საათს გაგრძელდა. 11–ვე დაკავებულს სამართალდამცველები ადმინისტრაციულ სამართალდარღვევათა კოდექსის 166–ე და 173–ე მუხლებით ედავებოდნენ, რაც წვრილმან ხულიგნობასა და პოლიციის მუშაკისთვის წინააღმდეგობის გაწევას გულისხმობს.

ვიდრე ადმინისტრაციული წესით დაკავებული 11 მუსლიმის სასამართლო პროცესი გაიმართებოდა, უკვე ცნობილი გახდა, რომ გაათავისუფლეს ის სამი დაკავებული, საქმე სისხლის სამართლის კოდექსის 353-ე მუხლის მე-2 ნაწილით იყო აღძრული. დაკავებულებს საქართველოს ახალგაზრდა იურისტთა ასოციაციის იურისტი რევაზ რევაზიშვილი იცავდა.

ასევე საიას იურისტები, გორის ოფისის წარმომადგენლები, ნონა ასკილაშვილი და დალი ჯანიაშვილი იცავდნენ ადმინისტრაციული წესით დაკავებულებს.

შეგახსენებთ, სამართალდამცველებმა მუსლიმები გუშინ, 22 ოქტომბერს, მოხეში, მეჩეთის შენობის გამო ადგილობრივებსა და სამართალდამცველებს შორის მომხდარი დაპირისპირებისას დააკავეს. მათი დაკავების გამო ადიგენის მუსლიმური თემი ორი დღეა ახალციხეში, შსს სამხარეო სამმართველოს შენობასთან აქციებს მართავს.

[თინათინ ზაზაძე, ნინო ნარიმანიშვილი, ახალციხე]