მოხეში დაკავებული 14 მუსლიმიდან 3 გაათავისუფლეს

„ამ ეტაპზე დადასტურებულად შეგვიძლია ვთქვათ, რომ სისხლის სამართლის წესით დაკავებული პირები არიან თავისუფალი. ამ ეტაპზე გათავისუფლების საფუძველი იყო ის, რომ მათ მიმართ არ არსებობდა ბრალის წაყენების საფუძველი. იმ ინფორმაციაზე დაყრდნობით, რაც თვითმხილველებისგან გვაქვს, დანაშაულის ნიშნები არ არსებობდა“, – განმარტავს საიას იურისტი რევაზ რევაზიშვილი, რომელიც დაკავებულების ინტერესებს იცავდა.

თუმცა, მისივე თქმით, ეს არ ნიშნავს იმას, რომ სისხლის სამართლის დევნა წყდება: „ეს არის ცალკე საკითხი. მთავარი საკითხი რაც იყო, რომ ჩვენი დაცვის ქვეს მყოფებს არ წარდგენოდათ ბრალი, მიღწეულია“.

რაც შეეხება დანარჩენ 11 მუსლიმს, მათი სასამართლო პროცესი ახალციხის რაიონულ სასამართლოში ამ წუთებში იწყება.

შეგახსენებთ, სამართალდამცველებმა მუსლიმები გუშინ, 22 ოქტომბერს, მოხეში, მეჩეთის შენობის გამო ადგილობრივებსა და სამართალდამცველებს შორის მომხდარი დაპირისპირებისას დააკავეს. მათი დაკავების გამო ადიგენის მუსლიმური თემი ორი დღეა ახალციხეში, შსს სამხარეო მთავარი სამმართველოს შენობასთან აქციებს მართავს.

[SKnews.ge]