მოხეში ძველი მეჩეთის დემონტაჟი პოლიციის დაცვით მიმდინარეობს

მეჩეთის დემონტაჟი მოხეში. ფოტო: "მე–9 არხი"

მოხეში, ძველი მეჩეთის შენობის ტერიტორიაზე ტენდერში გამარჯვებული კომპანიის წარმომადგენლები დღეს დილით გამოჩნდნენ. მათ შენობის დემონტაჟი დაიწყეს. მოხეში დილიდან იმყოფებიან სამართალდამცველებიც, რომლებმაც მეჩეთის შენობას ცოცხალი ჯაჭვი შემოავლეს.

„მეჩეთის გარშემო პოლიცია დგას და ხალხს შენობასთან მიახლოების უფლებას არ აძლევენ. პარალელურად, მიმდინაროებს შენობის დემონტაჟი“, – ამბობს ადგილობრივი მუსლიმი ოთარ მიქელაძე და ამატებს, რომ ხვალ მოხეში მუსლიმი მრევლი აქციას გამართავს, – „ხვალ ვგეგმავთ აქციის გამართვას. ეს აქციაზე მეტი იქნება. სოფელში ყველა შეწყვეტს მუშაობას და დაირაზმება მეჩეთის დასაცავად“.

ადგილზე შეკრებილია მუსლიმი და ქრისტიანი მრევლი, თუმცა, მათ შორის რაიმე დაპირისპირებას ადგილი არ ქონია.

მოხეში იმყოფება რეგიონის გუბერნატორი აკაკი მაჭუტაძე და შსს სამცხე – ჯავახეთის სამხარეო მთავარი სამმართველოს უფროსი თეიმურაზ კალანდაძე.

შეგახსენებთ, რომ მოხეში ძველი მეჩეთის შენობის დემონტაჟი დღეს, 22 ოქტომბერს განახლდა.

[მანანა სარაშვილი, ადიგენი]