სრულიად საქართველოს მუფთად ადამ შანთაძე აირჩიეს

საბჭოს 19 წევრიდან ადამ შანთაძეს მხარი13-მა დაუჭირდა. არჩევნები დღეს, 25 დეკემბერს მუსლიმთა სამმართველოს ბათუმის ოფისში ჩატარდა.

ერთ-ერთი მონაწილე, რომელმაც შანთაძეს მხარი დაუჭირა, სამცხე-ჯავახეთის მუფთი მამუკა ვაშაყმაძეა: „როგორც წესდებაში გვაქვს, ისე ჩატარდა არჩევნები, ფარული კენჭისყრა არ ყოფილა. ხელის აწევით, ხმათა უმრავლესობით გაიმარჯვა ბატონმა ადამ შანთაძემ“.

არჩევნებში სულ საბჭოს 19 წევრი მონაწილეობდა. მათგან შვიდი სხვადსხვა რეგიონის მუფთი და სამმართველოს 12 წევრი.

საბჭოს ორი წევრი შანთაძის არჩევის წინააღმდეგი იყო. სამუფთოს სამმა თანამშრომელმა კი პროტესტის ნიშნად თანამდებობა დატოვა. მათ შორის: ყოფილი მუფთის მრჩეველი თემურ გორგაძე, სამუფთოს პრესსამსახური, ოთარ ნადირაძე და სამუფთოს განათლების დოგმატიკის ხელმძღვანელი რეზო მიქელაძე.

როგორც სამცხე-ჯავახეთის მუფთი ამბობს, იგი რელიგიური საბჭოს დატოვებას ამ ეტაპზე არ გეგმავს: „ჯერჯერობით პროტესტი არ გამომითქვამს. შევხედავ, რამდენად სამართლიანად ჩაუდგება ამ საქმეს სათავეში, მუსლიმების სასარგებლოდ და საერთოდ ქვეყნისა და სამართლიანობის კუთხით როგორ იმუშავებს, როგორ გაუმკლავდება მიმდინარე პროცესებს. თუ უსამართლო იქნება, რა თქმა უნდა, მეც დავტოვებ“, - აცხადებს ვაშაყმაძე.

ამ დრომდე ადამ შანთაძე მუფთის მოადგილის პოზიციას იკავებდა. მუფთს, ბეგლარ ქამაშიძეს ხუთ წლიანი ვადა ნოემბრის ბოლოს ამოეწურა, დღეს გამართულ არჩევნებზე კი მან კანდიდატურა არ წამოაყენა. იგი მუსლიმთა სამმართველოს წევრად კვლავ რჩება.

სრულიად საქართველოს მუსლიმთა სამმართველოს წესდების მიხედვით, მუფთის არჩევნები ყოველ ხუთ წელიწადში ერთხელ იმართება.

[თაკო ფეიქრიშვილი, ახალციხე]