ოლეგ სანდროშვილი: "ჩემს მიმართ იმპიჩმენტი იგეგმება"

„2014 წლის 27 მარტს ფინანსთა სამინისტროს საგამოძიებო სამსახურის სამცხე-ჯავახეთის სამმართველოში „დაიბარეს“ ახალციხის მუნიციპალიტეტის გამგეობის ინფრასტრუქტურის განვითარებისა და ზედამხედველობის და გამწვანების სამსახურის სპეციალისტები, კერძოდ: რევაზ მერაბიშვილი, გიორგი ქასრაშვილი, ბესარიონ მიქელაძე და ემზარ მღებრიშვილი.

აღნიშნული პიროვნებებიდან მხოლოდ ორს, გია ქასრაშვილსა და რევაზ მერაბიშვილს ჩამოერთვათ წერილობითი ჩვენებები, ქალაქ ახალციხის ასპინძის ქუჩა #28-ში მდებარე საცხოვრებელი კორპუსის სახურავის სარეაბილიტაციო სამუშაოებთან დაკავშირებით.

საქმეზე სასაურველი ჩვენების მიღების მიზნით, რევაზ მერაბიშვილზე განხორციელდა ფსიქოლოგიური ზეწოლა. კერძოდ, „თითქოს“ ახალციხის მუნიციპალიტეტის საკრებულოს თავმჯდომარე ოლეგ სანდროშივილი ზეწოლას ახორციელებდა აღნიშნულ თანამშრომლებზე, იმ მიზნით, რათა მომხდარიყო მიღება-ჩაბარებებზე ხელის მოწერა, რის შედეგადაც შპს-ს ჩაერიცხებოდა შესრულებული სამუშაოს თანხა.

ზეწოლის შესახებ ფაქტი აღიარა რევაზ მერაბიშვილმა, რის შესახებაც გააკეთა შესაბამისი განცხადება, იმის თაობაზე, რომ მას აიძულეს ოლეგ სანდროშვილის წინააღმდეგ მიეცა უკანონო ჩვენება.

ყოველივე ზემოთაღნიშნული მიზნად ისახავდა ახალციხის მუნიციპალიტეტის საკრებულოს თავმჯდომარის ოლეგ სანდროშვილის მიმართ უკანონო ქმედებების განხორციელებას და მის საქმიანობისათვის ხელის შეშლას.

აღნიშნულს ადასტურებს ასევე მიმდინარე წელს საკრებულოს წევრებზე განხორცილებული მიზანმიმართული ზეწოლა, რათა განეხორციელბეინათ ოლეგ სანდროშვილის მიმართ იმპიჩმენტის პროცედურა და ჩამოეცილებინათ თანამდებობიდან უკანონო მეთოდებით.

აღსანიშნავია, რომ მუნიციპალიტეტის ნორმალური საქმიანობისთვის ხელისშეშლის მიზნით, ახალციხის მუნიციპალიტეტის გამგებელი ბესიკ ბლიაძე აბსურდული ბრალდებით იქნა მიცემული პასუხისგებაში“, - განუცხადა ჟურნალისტებს ოლეგ სანდროშვილმა დღეს, 3 აპრილს, გამართულ სპეციალურ ბრიფინგზე.

ბრიფინგი საკრებულოში ამ წუთებში მიმდინარეობს.

შეგახსენებთ, სპეციალური ბრიფინგის შესახებ საკრებულოს პრესსამსახურმა ჟურნალისტები, გუშინ, 2 აპრილს, საღამოს გააფრთიხლა.

[sknews.ge]