ახალციხის მეხუთე სკოლაში აქციისთვის ემზადებიან

ახალ ხელმძღვანელს სკოლის ადმინისტრაციამ ბეჭედი ოფიციალურად, დღეს 14 მარტს, მიღება-ჩაბარების აქტით გადასცა.

„ყველაფერი ცივილიზებულად მოხდა. ქალბატონმა ნანამ გადმომცა ბეჭედი და შევუდექი მუშაობას. მომავალი გვიჩვენებს, როგორ მოვიქცევი“, - აცხადებს მეხუთე საჯარო სკოლის დირექტორის დროებით მოვალეობის შემსრულებელი ინგა ვარდიძე.

ამ დროისთვის სკოლაში სიმშვიდეა. ნანა დათაშვილი, რომელიც ვარდიძის დანიშვნამდე, 11 თვის განმავლობაში ასრეულებდა სკოლის დირექტორის მოვალეობას, ამბობს, რომ ვითარების გარკვევას განათლების სამინისტროში შეეცდება: „ვიზრუნებ, რომ მოსწავლეებმა განათლების მიღება შეძლონ და ამაში ხელი არ შეეშალოთ. რაც შეეხება დანარჩენს, ვაპირებ უახლოეს დღეებში თბილისში წავიდე, მინისტრს შევხვდე და ყველაფრის შესახებ პირადად მოვახსენო“.

სავარაუდოდ დღეს გააგზავნიან განათლების სამინისტროში მეხუთე სკოლაში გუშინ, 13 მარტს, შემუშავებულ ტექსტსა და ხელმოწერებს, დირექტორის მოვალეობის შემსრულებლად ნანა დათაშვილის დანიშვნის მოთხოვნით.

გარდა ამისა, პედაგოგოები აპირებენ, საქართველოს პრემიერ-მინისტრს, ირაკლი ღარიბაშვილს მიმართონ.

„მივმართავთ საქართველოს პრემიერ-მინისტრს ირაკლი ღარიბაშვილს, როგორც ძველი ხელისუფლების დროს მიმდინარეობდა დანიშვნები, იგივე მეთოდები მეორდება და არასწორი გზა აქვთ არჩეული. პედაგოგებს, ინტელიგენციას უნდა ჰკითხონ აზრი. ჩვენ ვაპროტესტებთ დანიშვნის ფორმას, არ ვუპირისპირდებით პიროვნებას. რაც შეეხება ხელმოწერებს, პირადად მე წავიღებ განათლების სამინისტროში“, - ამბობს მეხუთე სკოლის პედაგოგი კლარა კუპრეიშვილი.

დღესვე პედკოლექტივი საპროტესტო აქციის ჩატარებას გეგმავს. მათი განცხადებით, აქცია 14:00 საათზე, გაკვეთილების დამთავრების შემდეგ დაიწყება.

შეგახსნებეთ, რომ 13 მარტს, ახალციხის მეხუთე საჯარო სკოლაში ახალი ხელმძღვანელის დანიშვნას ხმაური მოჰყვა. პედაგოგებმა და მოსწავლეებმა დირექტორის დროებით მოვალეობის შემსრულებლად ინგა ვარდიძის დანიშვნა გააპროტესტეს.

[თინათინ ზაზაძე, ახალციხე]