ხმაური ვანო მერაბიშვილის დედის ყოფილ სკოლაში

ახალციხის მეხუთე საჯარო სკოლას ახალი დირექტორის მოვალეობის შემსრულებელი ჰყავს. ინგა ვარდიძე მეხუთე საჯარო სკოლის პედაგოგებსა და მოსწავლეებს ახალციხის საგანმანათლებლო რესურსცენტრის უფროსმა ხათუნა ხმალაძემ დღეს, 13 მარტს, დილით წარუდგინა.

საქართველოს განათლებისა და მეცნიერების მინისტრის ბრძანების თანახმად, ინგა ვარდიძე მეხუთე საჯარო სკოლის დირექტორის დროებით მოვალეობის შემსრულებლად გუშინ, 12 მარტს დაინიშნა. მან ამ პოსტზე ნანა დათაშვილი შეცვალა, რომელიც მეხუთე საჯარო სკოლის დირექტორის მოვალეობას 11 თვის განმავლობაში ასრულებდა, მას შემდეგ, რაც ყოფილ დირექტორს, „ნაციონალური მოძრაობის“ გენერალური მდივნის ვანო მერაბიშვილის დედას, ჟენია მერაბიშვილს, სკოლა დაატოვებინეს.

ინგა ვარდიძის მისვლას მეხუთე საჯარო სკოლაში დილიდანვე ხმაური მოჰყვა. მართალია, სასწავლო პროცესი არ ჩაშლილა, თუმცა მოსწავლეები პირველივე შესვენებაზე გარეთ გამოვიდნენ და საპროტესტო აქცია დაიწყეს. პროტესტი თავიდანვე გამოხატეს სამასწავლებლოში შეკრებილმა პედაგოგებმაც. მასწავლებლები სკოლაში სასწავლო პროცესის ჩაშლით იმუქრებიან, მოსწავლეები კი აცხადებენ, რომ აქცია ყველა შესვენებაზე განახლდება: „იქამდე გავაპროტესტებთ, ვიდრე ნანა მასწავლებელი არ გვეტყვის დაიშალეთო“.

ნანა დათაშვილი ამბობს, რომ ახალი მოვალეობის შემსრულებელი ჟენია მერაბიშვილის წასვლიდან 60 დღის ვადაში უნდა დაენიშნათ: „11 თვეა მე ვასრულებ ამ მოვალეობას და თუ უნდა დაენიშნათ, აქამდე რატომ არ დაინიშნა?!“

ნანა დათაშვილმა დირექტორობის შესარჩევი გამოცდის მეორე ეტაპი, გასაუბრება ვერ გაიარა. ინგა ვარდიძე კი სერტიფიცირებული დირექტორია.

ინგა ვარდიძის თქმით, მოსწავლეებისა და მასწავლებლების პროტესტი იმით არის გამოწვეული, რომ მას არ იცნობენ: "როცა კარგად გამიცნობენ, მიხვდებიან, რომ ამ თანამდებობაზე მუშაობისთვის კარგი უნარ-ჩვევები მაქვს".

"სამხრეთის კარიბჭე“ მეხუთე სკოლაში რჩება და დეტალებს იკვლევს. როგორ განვითარდება სკოლაში მოვლენები, ეტაპობრივად გიამბობთ.



[sknews.ge]