დღე პირველი, დღე უკანასკნელი?! - ახალციხის მეხუთე სკოლის ახალ დირექტორს პედკოლექტივი უპირისპირდება [video]

'დღეს პირველი დღეა რატომ ლაპარაკობთ ასე ოფიცილურად', 'პირველი კი არა უკანასკნელი', 'თქვენი თავმოყვარეობის გამკვირვებია, ამხელა წინააღმდეგობის მერე გავიხურავდი კარს და გავიდოდი. ბავშვები გეძახდნენ წადი, წადი! ამ სკოლაში თქვენ ავტორიტეტს მოიპოვებთ? მაინტერესებს, თვენახევარში შეძლებთ ავტორიტეტის მოპოვებას? - ასე დასრულდა მცდელობა, პედკოლექტივსა და ვარდიძეს შორის დამოკიდებულება შეცვლილიყო.

ინგა ვარდიძემ შეხვედრა ისე დატოვა, პედაგოგებისთვის ვერაფრის ახსნა შეძლო. მის ოთახიდან (და შემდეგ სკოლიდანაც) წასვლას პედაგოგები აპლოდისმენტებით შეხვდნენ.



ინგა ვარდიძე საქართველოს განათლებისა და მეცნიერების მინისტრის N1/ა - 167 ბრძანებით, ახალციხის მეხუთე საჯარო სკოლის დირექტორის თანამდებობაზე დროებით მოვალეობის შემსრულებლად 2014 წლის 12 მარტს დაინიშნა.
ვარდიძე სკოლაში დღეს, 13 მარტს დილით მივიდა. თუმცა, მის გამოჩენას სკოლაში პროტესტი მოჰყვა. მოსწავლეებმა ტრანსფარანტებით ხელში შესვენებაზე აქცია გამართეს. მოსწავლეები და პედაგოგები სკოლაში დირექტორის მოვალეობის შემსრულებლად ნანა დათაშვილის დარჩენას ითხოვენ, რომელიც ამ პოსტზე თითქმის ერთი წელია, სკოლიდან ყოფილი დირექტორის, ჟენია მერაბიშვილის წასვლის შემდეგ მუშაობს.

დღის მეორე ნახევარში პედაგოგებმა სამინისტროში გასაგზავნი წერილის ტექსტი შეიმუშავეს და ხელმოწერების შეგროვება დაიწყეს.



[თინათინ ზაზაძე, თამარ თოთაძე, ახალციხე]