მეხუთე სკოლის პედკოლექტივი: ‘ახალ ხელმძღვანელთან მუშაობას არ ვაპირებთ’ [Video]

„უნდა აღინიშნოს, რომ ნანა დათაშვილი კეთილსინდისიერად და პროფესიონალურად უძღვებოდა თავისზე დაკისრებულ მოვალეობას. ამიტომ, კოლექტივი მხარს უჭერს მას და არ არსებობს საჭიროება სხვისი დანიშვნის“, - ეს არის პირველადი ვერსია იმ წერილის, რომელიც ახალციხის მეხუთე საჯარო სკოლის პედკოლექტივმა განათლების სამინისტროს სახელზე დაწერა და ხელმოწერების შეგროვება დაიწყო.

პედაგოგები ამბობენ, რომ სამინისტროში გაგზავნამდე წერილის ტექსტს სრულყოფენ. დღეს, 13 მარტის დღის ბოლომდე, მეხუთე სკოლაში 74 მასწავლებლის ხელმოწერა შეგროვდა. სკოლაში 90-მდე პედაგოგია. მასწავლებლები ამბობენ, რომ მათი ნაწილი დღეს სკოლაში საპატიო მიზეზის გამო არ იყო, თუმცა, ტელეფონით უკავშირდებოდნენ და თანადგომას უცხადებდნენ. ამიტომ, პედაგოგები ირწმუნებიან, რომ ხელმოწერების რაოდენობა გაიზრდება.

მეხუთე სკოლაში ამბობენ, რომ გაჩერებას არ აპირებენ: „არ ვაპირებთ ახალი ხელმძღვანელის შემოშვებას. არც ბეჭედს გადავცემთ. გაკვეთილებს არ ჩავშლით, მაგრამ გაკვეთილების დამთავრების შემდეგ აქციებს გავმართავთ“.



ახალციხის საგანმანათლებლო რესურსცენტრი კი სკოლის ადმინისტრაციას მოუწოდებს, საგაკვეთილო პროცესი არ შეაფერხონ და მოსწავლეებს ნუ იყენებენ. რესურცენტრის ხელმძღვანელმა ხათუნა ხმალაძემ ნანა დათაშვილი დღეს, დღის ბოლოს, რესურსცენტრში დაიბარა და გააფრთხილა, სკოლაში ვითარების დაძაბვას მოერიდოს.

როგორ განვითარდება მოვლენები სკოლაში და რა გადაწყვეტილებას მიიღებს დირექტორის მოვალეობის ყოფილი შემსრულებელი ნანა დათაშვილი, ამ ეტაპზე უცნობია. კითხვაზე გადასცემს თუ არა ოფიციალურად სკოლის ბეჭედს დირექტორის დროებით მოვალეობის ახალ შემსრულებელს, ნანა დათაშვილი გვპასუხობს: „ვერ გეტყვით რა მოხდება, ვიმოქმედებ კანონის ფარგლებში. დაველოდები, როგორ განვითარდება მოვლენები“.

პედაგოგები კი ირწმუნებიან, რომ აზრს არ შეიცვლიან.


შეგახსენებთ, რომ ინგა ვარდიძე საქართველოს განათლებისა და მეცნიერების მინისტრის N1/ა - 167 ბრძანებით, ახალციხის მეხუთე საჯარო სკოლის დირექტორის თანამდებობაზე დროებით მოვალეობის შემსრულებლად 2014 წლის 12 მარტს დაინიშნა. ვარდიძე სკოლაში დღეს, 13 მარტს დილით მივიდა. თუმცა, მის გამოჩენას სკოლაში პროტესტი მოჰყვა. მოსწავლეებმა ტრანსფარანტებით ხელში შესვენებაზე აქცია გამართეს. მოსწავლეები და პედაგოგები სკოლაში დირექტორის მოვალეობის შემსრულებლად ნანა დათაშვილის დარჩენას ითხოვენ, რომელიც ამ პოსტზე თითქმის ერთი წელია, სკოლიდან ყოფილი დირექტორის, ჟენია მერაბიშვილის წასვლის შემდეგ მუშაობს. ახალციხის საგანამანათლებლო რესურსცენტრი დილიდან ცდილობდა სკოლაში ვითარების განმუხტვას, თუმცა, სკოლის პედკოლექტივსა და რესურსცენტრს შორის მოლაპარაკება ვერ შედგა. მოლაპარაკება ვერც ინგა ვარდიძესა და სკოლის პედკოლექტივს შორის შედგა.

[თინათინ ზაზაძე, თამარ თოთაძე ახალციხე]