ახალციხის მეხუთე საჯარო სკოლაში, პროტესტის ნიშნად, გაკვეთილები არ ტარდება

დღეს დილიდან ახალციხის მეხუთე სკოლაში ყველა გაკვეთილი ცდება. მასწავლებლები კლასებში ღია კარის პრინციპით შედიან - ყველა საკლასო ოთახის კარი ღიაა, მოსწავლეებიც და მასწავლებლებიც კლასებში არიან, თუმცა, გაკვეთილი არ ტარდება.

ამ ფორმით მეხუთე საჯარო სკოლის პედკოლექტივი პროტესტს უცხადებს ინგა ვარდიძეს, რომელიც 12 მარტს, განათლებისა და მეცნიერების მინისტრის ბრძანებით, სკოლის დირექტორის თანამდებობაზე მოვალეობის შემსრულებლად დაინიშნა.

მასწავლებლები ამბობენ, რომ განათლებისა და მეცნიერების მინისტრთან, თამარ სანიკიძესთან სურთ შეხვედრა.

პარალელურად, დილიდან სკოლაშია და ვითარების განმუხტვას ცდილობს ინგა ვარდიძე. იგი ყველა საკლასო ოთახში დადის და მოსწავლეთა რაოდენობას ამოწმებს.

შეგახსენებთ, ინგა ვარდიძე მეხუთე საჯარო სკოლის დირექტორის მოვალეობის შემსრულებლად 12 მარტს დაინიშნა. იგი სკოლაში 13 მარტს მივიდა. მის გამოჩენას სკოლაში პედკოლექტივისა და მოსწავლეების პროტესტი მოჰყვა.

[თამარ თოთაძე, ნინო ნარიმანიშვილი, ახალციხე]