ვინ ასრულებს დირექტორის მოვალეობას მეხუთე სკოლაში

ახალციხის მეხუთე საჯარო სკოლაში დირექტორის მოვალეობას დირექტორის მოადგილე ნანა დათაშვილი ასრულებს. იგი დირექტორის მოვალეობის შემსრულებლი ჟენია მერაბიშვილის გათავისუფლებისთანავე ავტომატურად გახდა.

- ”ზოგადი განათლების შესახებ კანონის 41-ე და 43-ე მუხლების თანახმად, განათლების სამინისტროში დარეგისტირირებული პირი, ანუ ამ შემთხვევაში დირექტორის მოადგილე, ავტომატურად ასრულებს დირექტორის მოვალეობას”, - გვიხსნის დათაშვილი.

დირექტორის მოვალეობის შესრულება დათაშვილს ექვსი თვის განმავლობაში შეუძლია.

- ”თუ ამ ექვს თვეში განათლების სამინსიტრომ არ გამოაცხადა კონკურსი დირექტორის თანამდებობაზე, მაშინ ექვსი თვის გასვლის შემდეგ მეხუთე სკოლაში დირექტორი განათლების მინისტრის ბრძანებით დაინიშნება”, - ამბობს ახალციხის საგანმანათლებლო რესურსცენტრის უფროსის მოვალეობის შემსრულებელი დიანა ინასარიძე.

მისივე თქმით, სკოლაში დირექტორის ვაკანსიაზე კონკურსის გამოცხადება სამინისტროს პრეროგატივაა.

როგორც ნანა დათაშვილმა ”სამხრეთის კარიბჭესთან” განაცხადა, შესაძლოა დირექტორის ვაკანსიაზე კონკურსის გამოცხადების შემთხვევაში განაცხადი თავადაც შეიტანოს.

კონკურსის წესით აირჩევენ ახალ დირექტორს თუ ექვსი თვის გასვლის შემდეგ განათლების მინისტრის ბრძანებით დანიშნავენ მომავალი გვიჩვენებს.

შეგახსენებთ, რომ ჟენია მერაბიშვილი მეხუთე საჯარო სკოლის დირექტორის თანამდებობიდან 2 მაისს გაათავისუფლეს.

[თამუნა უჩიძე, ახალციხე]