ახალციხის მეხუთე სკოლაში ახალ დირექტორს კარის აჭედვით ემუქრებიან

დახურული შეხვედრა ახალციხის მეხუთე საჯარო სკოლაში დაახლოებით ნახევარი საათის წინ დაიწყო. შეხვედრას ახალციხის საგანმანათლებლო რესურცენტრის ხელმძღვანელი ხათუნა ხმალაძე, დირექტორის მოვალეობის ახალი შემსრულებელი ინგა ვარდიძე და სკოლის პედკოლექტივი ესწრებოდა. შეხვედრაზე შექმნილი მდგომარეობიდან გამოსავალი უნდა ეპოვათ. შეგახსენებთ, დღეს დილიდან, ინგა ვარდიძის მისვლას სკოლაში, პედაგოგებისა და მოსწავლეების პროტესტი მოჰყვა. მოსწავლეები და პედაგოგები დირექტორის მოვალეობის შემსრულებლად ყოფილ მოვალეობის შემსრულებელს, ნანა დათაშვილს ითხოვენ.

შეხვედრა ხმაურის ფონზე მიმდინარეობდა და საბოლოოდ, ხათუნა ხმალაძემ და ინგა ვარდიძემ შეხვედრა დატოვეს. ინგა ვარდიძის ოთახიდან გასვლას პედაგოგები აპლოდისმენტებით შეხვდნენ.

შეხვედრიდან რესურსცენტრის ხელმძღვანელმა და ახალმა დირექტორის მოვალეობის შემსრულებელმა დირექტორის კაბინეტში გადაინაცვლეს და ყოფილ მოვალეობის შემსრულებელს, ნანა დათაშვილს, ბეჭდის გადაცემა მოსთხოვეს. დათაშვილის გადაწყვეტილებას ბეჭდის გადაცემის შესახებ, სკოლის პედაგოგების უკმაყოფილება მოჰყვა.

მეხუთე საჯარო სკოლის პედაგოგები აცხადებენ, რომ ინგა ვარდიძეს დირექტორის კაბინეტის კარს აუჭედავენ. ისინი ითხოვენ დირექტორის მოვალეობის შემსრულებლად ნანა დათაშვილი დარჩეს, რომელიც ამ პოსტზე 11 თვეა, სკოლიდან ვანო მერაბიშვილის დედის, ჟენია მერაბიშვილის წასვლის შემდეგ მუშაობს.

[sknews.ge]