ახალციხის მეხუთე სკოლის პედაგოგები განათლების სამინისტროს სახელზე ხელმოწერებს აგროვებენ

სახელმწიფო-რწმუნებულის, გუბერნატორის ადმინისტრაციაში შეხვედრა რამდენიმე წუთის წინ დაიწყო. გუბერნატორს მეხუთე სკოლის ოთხი პედაგოგი ხვდება. შეხვედრა მედიისთვის დახურულია.

როგორც შეხვედრის დაწყებამდე მეხუთე სკოლის მასწავლებლებმა განუცხადეს „სამხრეთის კარიბჭეს“, ისინი აპირებენ გუბერნატორს მოახსენონ რა რეჟიმში უწევდათ მუშაობა გასული 9 წლის განმავლობაში, მაშინ როდესაც, სკოლის დირექტორი ყოფილი პრემიერ-მინისტრის, ვანო მერაბიშვილის დედა, ჟენია მერაბიშვილი იყო.

„უნდა მოვუყვეთ რა ტერორში ვმუშაობდით ამდენი წლები და უნდა ვთხოვოთ დახმარება, დარჩეს დირექტორის მოვალეობის შემსრულებლად ნანა დათაშვილი. ძლივს გვეღირსა ნორმალურ ადამიანთან თანამშრომლობა და ცვლილებები აღარ გვინდა“, - აცხადებენ პედაგოგები.

პარალელურად, მეხუთე სკოლაში უკვე დაიწყო ხელმოწერების შეგროვება. პედაგოგები განათლების სამინისტროში გასაგზავნ წერილს ამზადებენ, მათი მოთხოვნა უცვლელია,არ შეიცვალოს ნანა დათაშვილი.

შეგახსენებთ, დღეს, 13 მარტს, დილიდან, ახალციხის მეხუთე სკოლაში ხმაურია. პედაგოგები და მოსწავლეები ახალი დირექტორის მოვალეობის შემსრულებლის დანიშვნას აპროტესტებენ. ახალციხის საგანამანათლებლო რესურსცენტრი დილიდან ცდილობდა სკოლაში ვითარების განმუხტვას, თუმცა, სკოლის პედკოლექტივსა და რესურსცენტრს შორის მოლაპარაკება ვერ შედგა.

[sknews.ge]