მეხუთე სკოლის პედაგოგები განათლების მინისტრთან შეხვედრას ითხოვენ

მეხუთე სკოლაში ვითარება უცვლელია, მასწავლებლები ისევ შედიან კლასებში, თუმცა, გაკვეთილებს არ ატარებენ.

მათი მოთხოვნა უცვლელია, სკოლის დირექტორის მოვალეობის შემსრულებლად დაინიშნოს ნანა დათაშვილი, რომელიც ამ პოსტზე ბოლო 11 თვის განმავლობაში, სკოლიდან ჟენია თუმანიშვილის გათავისუფლების შემდეგ მუშაობდა.

მასწავლებლები ამბობენ, რომ ინგა ვარდიძე კლასების მდგომარეობას ამოწმებს და პედაგოგებს ეუბნება, თუ გაკვეთილები გაცდება, ეს მათ ანაზღაურებაზე აისახება.

"ხელფასის დაქვითვით ვერავის შეეაშინებს. მთელი 8 წლის განმავლობაში გვიქვითავდა ჟენია თუმანიშვილი, იმის მმართველობა არ მოგვწონდა, ახლაც იგივე ვითარებაა სკოლაში და ამას ვეღარ შევეგუებით", - ამბობენ პედაგოგები.

ნანა დათაშვილი ამბობს, რომ თუ ვითარება ასე გაგრძელდება, საფრთხე შეექმნება სკოლის ფუნქციონირებას: "ამიტომ, ვთხოვთ საქართველოს განათლებისა და მეცნიერების მინისტრს, ქალბატონ თამარ სანიკიძეს, პირადად შეგვხვდეს და ადგილზე გაეცნოს რა ვითარებაა სკოლაში".

მეხუთე საჯარო სკოლის მასწავლებლებმა განათლების სამინისტროს უკვე გაუგზავნეს ხელმოწერები, დირექტორის მოვალეობის შემსრულებლად ნანა დათაშვილის დანიშვნის მოთხოვნით.

სკოლის ახალი დირექტორის მოვალეობის შემსრულებელი ინგა ვარდიძე ამ ეტაპზე კომენტარის გაკეთებისგან თავს იკავებს.

შეგახსენებთ, დღეს, 17 მარტს, დილიდან, მეხუთე სკოლაში დირექტორის მოვალეობის შემსრულებლის წინააღმდეგ პროტესტი გრძელდება.

[თამარ თოთაძე, ნინო ნარიმანიშვილი, ახალციხე]