ასპინძისა და ახალციხის მუნიციპალიტეტების სოფლებში პრიორიტეტები შეარჩიეს

ასპინძასა და ახალციხეში სოფლის კრებების ჩატარება 26-27 თებერვალს დაიწყო და დღეს, 10 მარტს სრულდება.

ახალციხის მუნიციპალიტეტის გამგებლის მოადგილის მალხაზ ჟუჟუნაძის თქმით, მოსახლეობა წელს პრიორიტეტად სასმელი და სარწყავი წყლის სისტემის რეაბილიტაციას ასახელებს.

„მხოლოდ ერთ სოფელში, კლდეში დაასახელეს რიტუალების სახლი. ფაქტობრივად, აქ რიტუალების სახლი არ აქვთ, გარკვეული სამუშაოები ჩატარებულია და საბოლოოდ უნდა დასრულედეს. ამ ერთ შემთხვევას დავუშვებთ გამონაკლისის სახით, რადგან მითითება იყო, რომ რიტუალების სახლს მოეშვითო“, - ამბობს მალხაზ ჟუჟუნაძე.

სასმელი და სარწყავი წლის სისტემების მოწესრიგება ლიდერობს ასპინძაში შერჩეულ პრიორიტეტებშიც. რიტუალების სახლი მხოლოდ ორ სოფელში შეარჩიეს.
„რამდენიმე სოფელში სარწყულებელი არ აქვთ და მოსახლეობამ პრიორიტეტად სწორედ ეს დაასახელა. ზოგ სოფელში გარე-განათების გაკეთება მოითხოვეს, ზოგან კი სასმელი და სარწყავი წყლის სისტემის რეაბილიტაცია“, - ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი.

შეგახსენებთ, სოფლის კრებებზე ადგილობრივებს სოფლის საჭიროებები უნდა გამოეკვეთათ. კრებების დასრულების შემდეგ სოფლის რწმუნებულები მუნიციპალიტეტების გამგეობებში სხდომის ოქმს წარადგენენ, რომელშიც ყველა სოფელში დასახელებული პრიორიტეტები იქნება გაწერილი.

„სოფლის მხარდაჭერის პროგრამა“ მეექვსე წელია მიმდინარეობს. აღნიშნული პროგრამისთვის სახელმწიფო ბიუჯეტიდან გასული წლის მსგავსად, წელსაც 50 მილიონი ლარია გამოყოფილი. გასული წლისგან განსხვავებით, წელს გარდამავალი პროექტები აღარ იქნება. შეგახსენებთ, 2013 წელს სამცხე-ჯავახეთში 460 პროექტი განხორციელდა და აქედან 5 გარდამავალში გადავიდა. გასულ წელს სამცხე-ჯავახეთში პრიორიტეტები ასე გადანაწილდა: 26% რიტუალების სახლი, 26% გზის რეაბილიტაცია, 14% წყლის სისტემის მოწესრიგება.

[თამარ თოთაძე, ახალციხე]