„სოფლის მხარდაჭერის პროგრამა“ წელსაც 50 მილიონით დაფინანსდება

საქართველოს რეგიონული განვითარების სამინისტროში აცხადებენ, რომ „სოფლის მხარდაჭერის პროგრამის“ ფარგლებში სახელმწიფო ბიუჯეტიდან ადგილობრივი პროექტების განსახორციელებლად, გასული წლის მსგავსად, წელსაც 50 მილიონი ლარი გამოიყოფა.
სამინისტროს ინფორმაციით, პროგრამის ეფექტიანობის ამაღლების მიზნით, პროექტში რამდენიმე სიახლეა.

კერძოდ: 1. თანხა უნდა მოხმარდეს მხოლოდ ადგილობრივი მნიშვნელობის ინფრასტრუქტურული და კეთილმოწყობის ობიექტების მშენებლობა-რეაბილიტაციას, საერთო სარგებლობის შენობების აღჭურვას და/ან გრძელვადიანი სარგებლობის ტექნიკის შესყიდვა-აღჭურვას. რაც შეეხება ისეთ საჭიროებებს, როგორიცაა: ისტორიული ძეგლების, სოციალურ-კულტურული და რელიგიური დანიშნულების ობიექტების რეაბილიტაცია, სასოფლო-სამეურნეო დანიშნულების საქონლისა და მომსახურების შეძენა, მათი დაფინანსება დაუშვებელია.

2. მიმდინარე წელს გაიზრდება მცირეკომლიანი სოფლების რაც შეანელებს არასასურველ მიგრაციულ პროცესებს.

3. პროგრამით გათვალისწინებული სამუშაოები უნდა დასრულდეს აუცილებლად 2014 წელს.

საქართველოს რეგიონული განვითარების მინისტრის, დავით ნარმანიას განცხადებით, უახლოეს პერიოდში დაიწყება სოფლის კრებები, რომლის ფარგლებშიც შეგროვდება ინფორმაცია ამა თუ იმ სოფელში აუცილებლად განსახორციელებელი ინფრასტრუქტურული სამუშაოების შესახებ. ნარმანია მოსახლეობას მოუწოდებს მაქსიმალურად ჩაერთოს ამ პროცესებში.

ნარმანია, მედიას, არასამთავრობო ორგანიზაციებსა და სხვა დაინტერესებულ პირებსაც სთხოვს, ჩაერთონ პროცესის მონიტორინგში.

შეგახსენებთ, რა იცვლება 2014 წელს „სოფლის მხარდაჭერის პროგრამაში“, როგორ წარმოუდგენია სამინისტროს პროცესის ორგანიზება და რა მიმართულებები იქნება წელს პრიორიტეტი, ამ საკითხებზე სამინისტროს წარმომადგენლებმა სამცხე-ჯავახეთში შეხვედრა 18 თებერვალს გამართეს.

აქვე შეგახსენებთ, აღნიშნული პროგრამის ფარგლებში, 2013 წელს, სამცხე-ჯავახეთში, 3,605,112 ლარით 460 პროექტი დაფინანსდა და ამათგან, 2013 წელს 5-ის დასრულება ვერ მოესწრო.

[sknews.ge]