სამცხე-ჯავახეთის სოფლებში პრიორიტეტების შერჩევა დაიწყეს

25 თებერვალს კრებები უკვე გაიმართა ახალქალაქის მუნიციპალიტეტის სოფლებში: დილისკა, პტენა და ჩუნჩხა. 26 თებერვლიდან დაიწყო კრებების ჩატარება ახალციხის, ბორჯომისა და ნინოწმინდის მუნიციპალიტეტებში, 27 თებერვლიდან დაიწყეს სოფლების საჭიროებების გამოკვეთა ადიგენისა და ასპინძის მუნიციპალიტეტებში.

წინასწარ გაწერილი განრიგის მიხედვით, კრებების ჩატარება 7 მარტს უნდა დაასრულონ ადიგენსა და ასპინძაში, 9 მარტამდე გაგრძელდება - ბორჯომში და 10 მარტს დასრულდება სოფლის კრებები რეგიონის დანარჩენ მუნიციპალიტეტებში: ახალციხეში, ახალქალაქსა და ნინოწმინდაში.

შეგახსენებთ, სოფლის კრებები, „სოფლის მხარდაჭერის პროგრამის“ ფარგლებში, რეგიონის ყველა სოფელში უნდა ჩატარდეს. კრებებზე მოსახლეობა იმ პრობლემებს ასახელებს, რისი მოგვარებაც მათთვის პრიორიტეტულია. კრებებს ადგილობრივი თვითმმართველობის წარმომადგენლები და სოფლის რწმუნებულები ესწრებიან.

"სოფლის მხარდაჭერის პროგრამა" მეექვსე წელია მიმდინარეობს. აღნიშნული პროგრამისთვის სახელმწიფო ბიუჯეტიდან წელსაც, გასული წლის მსგავსად, 50 მილიონი ლარია გამოყოფილი.

გასულ წელს აღნიშნული პროგრამის ფარგლებში სამცხე-ჯავახეთში 460 პროექტი დაგეგმა და ამათგან მხოლოდ 5-ის დასრულება ვერ მოესწრო. წელს, რეგიონული განვითარების სამინისტროს გადაწყვეტილებით, პროგრამაში რამდენიმე სიახლეა, ერთ-ერთი ის, რომ გარდამავალი პროექტები აღარ იქნება.

სამინისტრო მოსხლეობას სოფლის კრებებზე დასწრებისკენ მოუწოდებს. გარდა ამისა, პროგრამის მონიტორინგში ჩართვას სთხოვს მედიასა და არასამთავრობო სექტორს.

[sknews.ge]