ბორჯომის მუნიციპალიტეტის სოფლებში პრიორიტეტები არ შეცვლილა

ერთთვიანი საჯარო განხილვების შემდეგ, ბორჯომის მუნიციპალიტეტის 38-ვე სოფელში პრიორიტეტები შეარჩიეს.

გასული წლების მსგავსად, ადგილობრივები წელსაც უპირატესობას ისეთ პროექტებს ანიჭებენ, როგორიცაა სასმელი წყლისა და გზების რეაბილიტაცია, გარე განათებისა და რიტუალების სახლის მოწყობა და სასაფლაოების შემოღობვა.

პრირიტეტის გამოვლენის მიზნით ბორჯომის მუნიციპალიტეტში სოფლის კრებების ჩატარება 26 თებერვალს დაიწყო და 9 მარტს დასრულდა. კრებებს ადგილობირივი თვითმმართველობის წარმომადგენლებიც ესწრებოდნენ.

მას შემდეგ რაც პრიორიტეტები პროექტის სახეს მიიღებს და დამტკიცდება, ბორჯომში სამუშაოები დაიწყება. ადგილობრივ ხელისუფლებაში ვარაუდობენ, რომ „სოფლის მხარდაჭერის პროგრამის“ ფარგლებში ბორჯომში სამუშაოები მაისიდან დაიწყება.

გასულ, 2013 წელს, „სოფლის მხარდაჭერის პროგრამის“ ფარგლებში, ბორჯომს 419,901 ლარი ერგო. აღნიშნული თანხით ბორჯომის მუნიციპალიტეტის 11 ტერიტორიულ ორგანოში, 48 პროექტი განხორციელდა. ყველა დაგეგმილი პროექტი გასულ წელს დასრულდა.

[თინათინ ზაზაძე, ბორჯომი]