რა იცვლება „სოფლის მხარდაჭერის პროგრამაში“?

რა იცვლება 2014 წელს „სოფლის მხარდაჭერის პროგრამაში“, როგორ წარმოუდგენია სამინისტროს პროცესის ორგანიზება და რა მიმართულებები იქნება წელს პრიორიტეტი, ამ საკითხებზე დღეს, 18 თებერვალს, ახალციხის მუნიციპალიტეტის ადგილობრივი ხელისუფლების წარმომადგენლებსა და სოფლების რწმუნებულებს რეგიონული განვითარების სამინისტროს წარმომადგენლები ესაუბრნენ.

საქართველოს რეგიონული განვითარებისა და ინფრასტრუქტურის სამინისტროს რეგიონული პოლიტიკის დემარტამენტის უფროსის გიორგი წაქაძეს განმარტებით, 2014 წელს მნიშვნელოვანი სიახლეა ის, რომ გარდამავალი პროექტები აღარ იქნება, დაგეგმილი პროექტები მიმდინარე წელსვე უნდა დასრულდეს. გარდა ამისა, კონკურეტულად განისაზღვრა პროექტების თემატიკა.

„უფრო ინფრასტრუქტურული და კეთილმოწყობის ობიექტებისკენ იქნება მიმართული თანხები. სიახლედ შეიძლება განვიხილოთ ისიც, რომ პროცედურა გამარტივდა. თითოეული პროექტის განხილვა და შეთანხმება მოხდება სამინისტროსთან, ნაცვლად მთავრობის სხდომაზე დამტკიცებისა“, - განმარტავს წაქაძე.

მისივე თქმით, მნიშვნელოვნად არაფერი შეცლილა პროექტების დაფინანსების კუთხით. ახალციხის მუნიციპალიტეტი წელსაც იგივე თანხას მიიღებს, რაც წინა წელს ჰქონდა.

„მთლიან მიდგომაში განსხვავება ისაა, რომ პატარა სოფლებს ცოტა მეტი თანხა გამოეყოთ, ვიდრე გამოეყოფოდათ წინა წლებში. ამით გვინდა პატარა სოფლებიდან მოსახლეობის მიგრაცია შევამციროთ“, - ამბობს გიორგი წაქაძე.

საქართველოს რეგიონული განვითარებისა და ინფრასტრუქტურის სამინისტრო მსგავს შეხვედრებს თითქმის ყველა მუნიციპალიტეტში მართავს.

შეგახსენებთ, „სოფლის მხარდაჭერის პროგრამის“ ფარგლებში, 2013 წელს, სამცხე-ჯავახეთისთვის 3,605,112 ლარი გამოიყო. ამ თანხით რეგიონში 460 პროექტი დაფინანსდა. პრიორიტეტი, თითქმის ყველა მუნიციპალიტეტში რიტუალების სახლის რეაბილიტაცია/ინვენტარით აღჭურვა, სასმელი წყლის პრობლემის მოგვარება და შიდა გზების მოწესრიგება იყო. 460 პროექტიდან გარდამავალ პროექტებში 5 პროექტი გადავიდა.

[თამარ თოთაძე, ახალციხე]