'სოფლის მხარდაჭერის პროგრამა' რიტუალების სახლს გასცდა

პროგრამის ფარგლებში შერჩეულ პრიორიტეტებში, რიტუალების სახლი ისევ მოხვდა, თუმცა, არა იმდენი, როგორც ეს გასულ წლებში იყო. იმ 35 სოფლიდან, სადაც პრიორიტეტები უკვე გარკვეულია, რიტუალების სახლს 5 სოფელში გააკეთებენ. ეს სოფლებია: თისელი, წირა, მიქელწმინდა, ორალი და ტყემლანა.

სასმელი და სარწყავი წყლის სისტემის რეაბილიტაცია იგეგმება 18 სოფელში: გურკელში, წინუბნში, საყუნეთში, გიორგიწმინდაში, წნისში, კლდეში, ბოგაში, ტატანისში, ანდაში, ელიაწმინდაში, ჭვინთაში, წყრუთში, ყულალისში, ანდრიაწმინდაში, ღრელში, ხაკში, წყორძასა და მუსხში.

ორ სოფელში: ჯულღასა და წინუბანში, წელს თანხას გზის რეაბილიტაციას მოახმარენ. წინუბანსა და აბათხევში მოწესრიგდება სანიაღვრე არხებიც.

სოფელ ბოგაში სასმელი წყლის რებილიტაციასთან ერთად, მოსახლეობა რიტუალების სახლისთვის მაცივარს შეიძენს. ანში სამედიცინო პუნქტის მშენებლობა იგეგმება, ნაოხრებში გარე განათება გაკეთდება, ივლიტაში კი გაბიონის კედელი გაკეთდება და კლუბის ერთი ოთახი გარემონტდება.
სხვილისში კულტურის სახლის შენობის ფანჯრები გამოიცვლება, დარჩენილი თანხით კი შესაძლებელია სკვერის რეაბილიტაცია დაიწყოს.

„როგორც მოსახლეობას სურს, დარჩენილი თანხით სკვერის რეაბილიტაციას ვერ დავიწყებთ, ამისთვის გაცილებით დიდი თანხაა საჭირო. ჯერ მოვამზადოთ სკვერის პროექტი და მერე გადავწყვიტოთ როგორ მოვიქცეთ“, – ამბობს ახალციხის მუნიციპალიტეტის გამგებელი ზაზა მელიქიძე.
დიდ პამაჯში წყლის გამანაწილებელის და კლუბის რეაბილიტაცია იგეგმება, საძელში თანხის ძირითადი ნაწილი საბავშვო ბაღის ადმინისტრაციული შენობის რეაბილიტაციისთვის დაიხარჯება, ნაწილი კი სასმელი წყლის სათავე ნაგებობის რეაბილიტაციისთვის.

მინაძის და ჭაჭარაქის მოსახლეობამ გადაწყვიტა, რომ თანხა გააერთიანონ და საბავშო ბაღი აღადგინონ, ხეოთში კი სასაფლოს ხიდის რებილიტაცია იგეგმება. ამავე სოფელში აღდგება ეგრეთ წოდებული მთის სახლი.

ამ ეტაპზე უცნობია რისი გაკეთება იგეგმება: ვალეში, სოფელ აწყურში, აგარაში, მუგარეთში, ზიკილიაში, წნისში, ზემო სხვილისში, ახალშენსა და ურაველში. აღნიშნულ სოფლებში რამდენიმე პრიორიტეტია გამოკვეთილი, თუმცა მოსახლოება ჯერ – ჯერობით საბოლოო პრიორიტეტზე ვერ თანხმდება, ამიტომ გადაწყვეტილების მისაღებად კრება ისევ ჩატარდება.

იმ სოფლებში, სადაც უკვე გამოიკვეთა პრიორიტეტი, პროექტების შესადგენად ტენდერები რამდენიმე დღეში გამოაცხადებს.

შეგახსენებთ, რომ „სოფლის მხარდაჭერის პროგრამის“ ფარგლებში ახალციხის მუნიციპალიტეტისთვის 650. 590. 00 ლარი გამოიყო.

[მანანა სარაშვილი, ახალციხე]