ადვოკატი - ვ.გ-მ გაუპატიურება რაღაცის სანაცვლოდ დაიბრალა

ადვოკატი აცხადებს, რომ სასამართლომ სამართლიანი გადაწყვეტილება გამოიტანა, რადგან პროკურატურამ ვერ წარმოადგინა ვერცერთი მტკიცებულება, რომელიც პირდაპირ მიუთითებდა ბრალდებულების მიერ რაიმე დანაშაულის ჩადენის ფაქტს.

„ეს იყო წმინდად შეთითხნილი საქმე, არაორგანიზებული, ძალიან დაბალი დონის მცდელობა, რომ ეს ხალხი მიეცა პასუხისგებაში და დაესაჯათ“, - ამბობს ალხაზიშვილი.

მისი თქმით, გამომძიებელმა გელა მაღრაძემ დაკითხვის დროს ვერ მიუთითა ვერცერთ პირდაპირ მტკიცებულებაზე: „მეორე მნიშვნელოვანი მომენტი ამოცნობის ოქმის გაყალბებაა. ამოცნობა ჩატარდა დილის 11:00 საათზე, გადაასწორეს და მოსამართლეს საქმეში ჩაუდეს, რომ ამოცნობა მოხდა 23:00 საათზე. ასევე, ჯერ თქვეს რომ ესწრებოდა ამოცნობას 3 კაცი, მერე აღმოჩნდა რომ ესწრებოდა 4. მერე კიდევ გაირკვა, რომ იქ იყო მე-5 პიროვნებაც. ამ პროცესს ესწრებოდა სამხარეო მთავარი სამმართველოს თანამშრომელი, რომელიც ვითომ წესრიგს იცავდა, რომ არაფერი მოხმდარიყო. მათ ყალბი დოკუმენტები შექმნეს“.

ხვედელიანის საქმე ორი ეპიზოდისგან შედგებოდა. ახალდაბის ეპიზოდზე საქმე 18 თვის, ბაკურიანის ეპიზოდზე კი 45 თვის მერე აღიძრა.

„ მანამდე ეს ადამიანები არ ჩიოდნენ, არაფერს აკეთებდნენ“, - ამბობს ალხაზიშვილი და ამატებს, რომ მოსაზრება, რომ ვითომ ამის მიზეზი ქვეყანაში არსებული ტოტალური რეჟიმი იყო, სიცრუეა.

კითხვაზე გაუპატიურების ფაქტის არ არსებობის შემთხვევაში, რატომ დაიბრალებდა 26 წლის მამაკაცი მომხდარს, გვპასუხობს: „ვ. გ-მ გაუპატიურება დაიბრალა გარკვეული რაღაცის ნაცვლად, ეს უკვე ჩანს“.

მისივე თქმით, ასე რომ არ ყოფილიყო, 40 სმ-იანი სკამის ფეხის შეყვანის გამო იგი გარდაიცვლებოდა და თუ ასე არ მოხდებოდა, მაშინ ქირურგიული ჩარევა მაინც დასჭირდებოდა, რაც არ მომხდარა: „გაუპატიურება ექსპერტების დასკვნით არ დადასტურდა“.

ალხაზიშვილს ეჭვი აქვს, რომ ეს საქმე პროკურატურამ ხვედელიანისთვის შეკერა: „რაღაცა ბრძანება არსებობდა, რომელსაც დაექვემდებარნენ“.

[თამუნა უჩიძე, ახალციხე]