ყალბი მტკიცებულებები ხვედელიანის საქმეში?

ხვედელიანის პროცესზე, რომელიც დღეს ხუთი საათის განმავლობაში მიმდინარეობდა, ბრალდების მხარის მტკიცებულებების გამოკვლევა დასრულდა.

სასამართლოზე ბრალდებულების ალექსანდრე ბლიაძისა და სერგო სამსონიძის ამოცნობისა და საგამოძიებო ექსპერიმენტის ჩატარების ოქმები თანდართულ ვიდეო მასალასთან ერთად გამოიკვლიეს. ასევე წარმოდგენილი იქნა ხვედელიანის ბინის ჩხრეკის ვიდეო ჩანაწერიც. ეს უკანასკნელი ხვედელიანის თხოვნითა და ადვოკატების თანხმობით პროცესზე ბოლომდე არ იქნა ნაჩვენები.

დაცვის მხარემ სადაოდ გახადა 2012 წლის 29 ნოემბრის ალექსანდრე ბლიაძეს ამოცნობის ოქმი. როგორც პროცესზე მისმა ადვოკატმა დემურ ალხაზიშვილმა განაცხადა ამოცნობას ესწრებოდა სამხარეო მთავარი სამმართველოს უკვე ყოფილი უფროსი ტალახაძე და მისი მოადგილე ხორბალაძე.

”რატომ არ არის მითითებული ოქმში თუ ვინ აწარმობდა გადაღებას?! რატომ არ ამჟღავნებს პროკურატურა მის ვინაობას, უჩინმაჩინი ხომ არ იყო, ხომ არსებობს რეალური ადამიანი ვინც ამოცნობის პროცესი გადაიღო?! - კითხულობენ ადვოკატები და ამატებენ, რომ პროცესს სამხარეო-მთავარი სამმართველოს დეტექტივ-გამომძიებლის თანაშემწე დავით ბოჩიკაშვილი იღებდა, თუმცა მან აღნიშნული სასამართლოსთან ჩვენების მიცემისას კატეგორიულად უარყო.

გარდა აღნიშნულისა, ადვოკატების განცხადებით, ოქმის შევსების დრო არასწორადაა მითითებული, დოკუმენტში, რომელიც მათ ბრლადების მხარემ გადასცა 11:20 საათია მითითებული, იგივე დოკუმენში კი მოსამართლესთან 23:20 წუთია დატანილი.

”ოქმი რომელიც მე გადმომეცა დრო ჩასწორებულია”, - განუმარტა მოსამართლე გოჩა ჯეირანაშვილმა ადვოკატებს.

ოქმის შევსებისას თარიღთან დაკავშირებით რომ ტექნიკური შეცდომაა დაშვებული, ეს სასამართლოსთან ჩვენების მიცემისას სამცხე-ჯავახეთის საოლქო პროკურატურის საგამოძიებო ნაწილის გამომძიებელმა გელა მაღრაძემაც დაადასტურა.

აღნიშნულიდან გამომდინარე დაცვის მხარე აცხადებს, რომ ბლიაძის ამოცნობის ოქმი ყალბია.

ადვოკატები არც სერგო სამსონიძის ამოცნობის ოქმსა და ვიდეო ჩანაწერის უტყუარობას იზიარებენ.

როგორც ჩანაწერში ჩანს, გელაშვილი, ანუ დაზარალებული, მარცხნიდან მეორეს, სერგო სამსონიძეს ადებს ხელს და ამბობს: ”ეს მაყენებდა შეურაცხყოფას, მერე ფოტოებს მიღებდა”.

ადვოკატების თქმით, პროკურატურამ სამსონიძე დაზარალებულს წინასწარ დაანახა, რომ შემდეგ ამოეცნო: ”როგორ ამოიცნო დაზარალებულმა სამსონიძე, როცა სასამართლოსთან ჩვენების მიცემისას თქვა, წამების პროცესში სახით იატაკისკენ ვეგდეო, მერე კი ამბობს თან მაწამებდნენ და თან ფოტოებს მიღებდნენო. თუ აწამებდნენ სახე როგორ დაიმახსოვრა?!”

მოსამართლემ აქცენტი ვიდეო ჩანაწერების თარიღზე გააკეთა, არცერთ ამოცნობის ჩანაწერს თარიღი თან არ ერთვოდა. ადვოკატები ამბობენ, რომ შედარებისთვის ვიდეოზე თანდართულ დროს ამ შემთხვევაში დიდი მნიშვნელობა ენიჭებოდა, ასე ოქმის შედგენის ნამდვილი დროის დადგენის შესახებ მსჯელობა შეიძლებოდა.

ისევე როგორც ბლიაძისა და სამსონიძის ამოცნობის ოქმები, დაცვის მხარემ სადაო გახადა საგამოძიებო ექსპერიმნეტის ოქმი, რომელიც 2012 წლის 12 დეკემბერს შედგა. ოქმს თან დართულ ვიდეოში დაზარალებული აჩვენებს იმ ადგილს, სადა ის სკამის ფეხით გააუპატიურეს.

”ამ მაგიდაზე დამადებინეს თავი, იმ კუთხიდან (მარჯვენა მხარეს აჩვენებს ხელით) აიღეს სკამი და ფეხით გამაუპატიურეს” - ამბობს ჩანაწერში ბრალდებული.

იგი ამ ვიდეოში ხვედელიანს არსად ახსენებს. ადვოკატები კი აცხადბენ, რომ ეს შეთითხნილი ექსპერიმენტია.

ბრალდების მხარის მტკიცებულებების გამოკვლევის დასრულების შემდეგ დაცვის მხარის მტკიცებულებების გამოკვლევა დაიწყო. დღევანდელ პროცესზე პროკურატურის გამომძიებელი ვანო კაჭკაჭიშვილი დაიკითხა, თუმცა, მან ვერცერთ დასმულ კითხვაზე პასუხი ვერ გასცა, იმ მიზეზით, რომ არაფერი ახსოვდა.

პროცესის დასრულებამდე ბრალდებულების ალექსანდრე ბლიაძის, გიორგი ბლიაძისა და სერგო სამსონიძის ადვოკატებმა მოსამართლესთან შუამდგომლობა დააყენეს და მათი დაცვის ქვეშ მყოფებზე სისხლის სამართლებრივი დევნის შეწყვეტა ითხოვეს, იმ მიზეზით რომ ვერცერთ მათგანს ბრალი ვერ უდასტურდებოდა.

მოსამართლემ ადვოკატების შუამდგომლობა არ დააკმაყოფილა და განაცხადა, რომ დაუსაბუთებლობის გამო, ის არც კი განიხილება.

მომავალი პროცესი 8 მაისს ჩაინიშნა.

[თამუნა უჩიძე, ახალციხე]