ბორჯომის პოლიციის ყოფილი უფროსი და „ნაციონალური მოძრაობის“ დეპუტატობის კანდიდატი ბორჯომში მამუკა ხვედელიანი და მის საქმეში ოთხივე ბრალდებული: სერგო სამსონიძე, ალექსანდრე ბლიაძე, გიორგი ლომიძე და გიორგი ბლიაძე, რომელთაც მამაკაცის სკამის ფეხით გაუპატიურებაში ედებოდათ ბრალი, ახალციხის რაიონულმა სასამართლომ დღეს უდანაშაულოდ სცნო.
მეოცე სასამართლო პროცესი, რომელიც ბრალდებულების პირჯვრისწერით დაიწყო, სიხარულის ცრემლებითა და შეძახილებით დასრულდა.
ხვედელიანის გათავისუფლების შესახებ მოსამართლის განცხადებას დარბაზში ტაში და შეძახილები მოჰყვა. დამსწრეების ნაწილს, იმის გამო, რომ ემოციებს ვერ მალავდა, დარბაზი დაატოვებინეს, ნაწილმა კი თავი შეუძლოდ იგრძნო და დარბაზი თავად დატოვა.
„სასამართლოს განაჩენი უნდა ემყარებოდეს გონივრულ ეჭვს მიღმა არსებულ ურთიერთშეთანხმებულ მტკიცებულებათა ერთობლიობას. წარმოდგენლი მტკიცებულებების თანახმად, ბრალდების მხარის მტკიცებულებები ერთმანეთს გამორიცხავდა, ზოგიერთ შემთხვევაში კი საერთოდ გამორიცხავდა იმ ფაქტს, რასაც ადასტურებდნენ სხვა მოწმეები“, - განაცხადა განაჩენის გამოცხადების შემდეგ სასამართლო პროცესზე მოსამართლე გოჩა ჯეირანაშვილმა.
მისი თქმით, წერილობით მტკიცებულებებში შეიძლება მექანიკური შეცდომა იქნეს დაშვებული, მაგრამ აღნიშნული გარემოება აუცილებლად უნდა იქნას ცნობილი დაცვის მხარისთვის: „ბრალდების მხარემ არ გაუცვალა დაცვის მხარეს მტკიცებულება. ამიტომ, სასამრთლომ მიიჩნია, რომ ეს იყო დაუშვებელი მტკიცებულება სისხლის სამართლის საპროცესო კოდექსის მიხედვით“.
სასამართლომ არც ის მტკიცებულება გაიზიარა, რომელიც ვიდეო ჩანაწერის სახით იყო წარმოდგენილი.
„ამოცნობის ოქმში წარმოდგენილი ვიდეო ჩანაწერი არ შეესაბამებოდა წერილობით მტკიცებულებაში მითითებულ მნიშვნელოვან ელემენტებს. ამიტომ სასამართლომ დაუშვებლად სცნო ეს მტკიცებულებაც“, - განაცხადა ჯეირანაშვილმა.
სასამართლო დარბაზიდან გამოსული უკვე ყოფილი ბრალდებულები პრესასთან განცხადებებს არ აკეთებდნენ.
„სხვა დროს იყოს“, - გვითხრა მამუკა ხვედელიანმა,.
„მადლობა უფალს და მადლობა მოსამართლეს, რომ ასეთი სამართლიანი განაჩენი გამოიტანა. მადლობა, რომ არ დაექვემდებარა იმ ზეწოლას, რა ზეწოლის ქვეშაც ეგ კაცი იქნებოდა. მადლობა უფალს!“, - განაცხადა ხვედელიანის დედამ ჯილდა ხვედელიანმა.
ბრალდებულებს შორის კომენტარი დარბაზიდან გამოსვლისას მხოლოდ ალექსანდრე ბლიაძემ გააკეთა: „ „სამართლიანობის აღდგენა დაიწყო დღეს და არა ოქტომბერში. დიდი მადლობა დღევანდელ სასამართლოს! სამართლიანობის აღდგენა დღეს იწყება. ეშინოდეს, ვინც ჩემს მიმართ უკანონო ქმედებები ჩაიდიან. ყველაფერს მოვითხოვ კანონის შესაბამისად“.
ადვოკატების განცხადებით, მორალური ზიანისათვის კომპენსაციას მოითხოვენ თუ არა ყოფილი ბრლადებულები, ჯერ გადაწყვეტილი არ არის.
„ეგ უკვე თავად უნდა გადაწყვიტოს გამართლებულმა ბრალდებულმა. ჯერ ვერაფერს გეტყვით“, - ამბობს ხვედელიანის ადვოკატი მერაბ გოგოლაძე.
წინასწარ კომპენსაციის მოთხოვნის შესახებ ვერც სერგო სამსონიძის ადვოკატი გიორგი ჭალიძე საუბრობს: „პასუხი ამ საკითხთან დაკავშირებით მოგვიანებით გვექნება“.
პროკურორის მირიან ჭუმბურიძის კომენტარს სასამართლო გადაწყვეტილების შესახებ „სამხრეთის კარიბჭე“ მოგვიანებით შემოგთავაზებთ.
შეგახსენებთ, რომ მამუკა ხვედელიანს, ალექსანდრე ბლიაძეს, სერგო სამსონიძეს, გიორგი ბლიაძესა და გიორგი ლომიძეს დამამცირებელ და არაადამიანურ მოპყრობაში ედებოდათ ბრალი.
როგორც „სამხრეთის კარიბჭესთან“ დაზარალებულად ცნობილი
აცხადებდა, იგი სკამის ფეხით 2009 წლის პირველი იანვრის ღამეს გააუპატიურეს და ფოტოები გადაუღეს.
„ხვედელიანმა ფოტოები დაათვალიერა და მითხრა, თუ არ ვიტყოდი რა მოხდა, მაშინ ამ ფოტოებს ბაკურიანში გამოაკრავდა“, - ამბობს დაზარალებული ვ.გ.
ვ.გ. ფიქრობდა, რომ ასეთი დანაშაული არავის შერჩებოდა: „ყურზე სიგარეტი ჩამაქრეს, სახეში მირტყამდნენ. მომხდარი რომ მართალი არ იყოს, გაუპატიურებას არავინ დაიბრალებდა“.
[თამუნა უჩიძე, ახალციხე]
ამავე თემაზე იხილეთ
ვიდეომასალა