ბორჯომის პოლიციის ყოფილი უფროსის საქმეში დაზარალებულები ვეღარაფერს იხსენებენ

დღეს, 27 თებერვალს, პროცესზე ორი დაზარალებული და სასამართლოს სამედიცინო ექსპერტი დაიკითხა. სხდომა ამჯერადაც დახურული იყო.

პრესასთან კომენტარის გაკეთება ხვედელიანის ადვოკატებმა არც ამჯერად ისურვეს.

სამმართველოს ყოფილი თანამშრომლის, ალექსანდრე ბლიაძის (რომელიც ხვედელიანთან ერთად დააკავეს) ადვოკატის დემურ ალხაზიშვილის თქმით, სასამართლოზე დაკითხული დაზარალებულები გელაშვილი და მოტოიანი მომხდარის შესახებ ვერაფერს იხსნებენ.

- ”ვერ იგონებენ თუ რომელმა პოლიციელმა დაარტყათ. ავაყენე ხუთი ბრალდებული და სათითაოდ ვკითხე ყველაზე მოტოიანს, თუ რომელთან ჰქონდა პრეტენზია და აღმოჩნდა რომ მას პრეტენზია არცერთ მათგანთან არ ჰქონდა. ამდენად, გამოდის, რომ დაზარალებულად გელაშვილი და მოტოიანი ტყუილად სცნეს”, - ამბობს ალხაზიშვილი.

ადვოკატი მიიჩნევს, რომ ამის შემდეგ კანონით დადგენილი წესით, პროკურორმა უნდა დააყენოს შუამდგომლობა დაზარალებულებად ცნობის გაუქმების შესახებ.

- ”ასევე დაზარალებულები ვერ ხსნიან, მომხდარი დანაშაულის შესახებ თუ რატომ არ შეიტანეს საჩივარი აქამდე. ე.ი. დანაშაული დაფარეს. დანაშაულის დაფარვა კიდევ ისჯება სისხლის სამართლის კოდექსის მიხედვით”, - აცხადებს ალხაზიშვილი.

ადვოკატი ფიქრობს, რომ საბოლოო გადაწყვეტილების გამოტანამდე კიდევ არა ერთი პროცესი ჩატარდება: ”ჩვენ ყველა მტკიცებულება სადაო გავხადეთ, ამიტომ ყველა მოწმე უნდა დაიკითხოს”.

ხვედელიანს ბრალი სისხლის სამართლის კოდექსის 144 /2 ა. ბ.ე, 143/ 3 ა, 333/ 3, ბ გ 147 / 1 და 148 მუხლებით ედება.

ხვედელიანი, 2012 წლის 30 ნოემბერს, სამცხე-ჯავახეთის საოლქო პროკურატურისა და შს მთავარი სამმართველოს თანამშრომლებმა, თბილისში დააკავეს. ხვედელიანი წლების განამვლობაში მუშაობდა ბორჯომის შს სამმართველოს უფროსის თანამდებობაზე. 2012 წლის საპარლამენტო არჩევნებში კი ”ნაციონალური მოძრაობიდან” ბორჯომის მაჟორიტარ დეპუტატად იყო წარდგენილი.

[თამუნა უჩიძე, ახალციხე]