რას ჰყვებიან ხვედელიანის საქმეზე მოწმეები

დღეს ახალციხის რაიონულ სასამართლოში ბორჯომის პოლიციის ყოფილი უფროსის მამუკა ხვედელიანის პროცესი 5 საათს მიმდინარეობდა. პროცესზე 6 მოწმე დაიკითხა, მათ შორის 5 ბორჯომის პოლიციის თანამშრომელი იყო.

პირველად ჩვენება ახალდაბის მკვიდრმა ნიკოლოზ ლომიძემ მისცა. იგი მეგობრებთან ერთად 2011 წლის 26 მაისს თბილისში მიტინგზე იყო. მისი თქმით, აქციის დარბევის შემდეგ ბორჯომში დაბრუნდნენ და სასადილოში ერთმანეთისათვის მოსაზრებების გასაზიარებლად შეიკრიბნენ. თუმცა, მანამდე სანამ შეკვეთილ ხინკალს მოიტანდნენ მათთან კუპეში ბორჯომის პოლიციის უფროსი მამუკა ხვედელიანი და ერთ-ერთი თანამშრომელი ალექსანდრე ბლიაძე შევიდნენ, იქ მყოფები ჩხუბში დაადანაშაულეს და პოლიციაში წაიყვანეს.

- ”პოლიციაში ხვედელიანმა მკითხა, მიტინგზე რატომ იყავიო და პირველად მან დამარტყა. 5-6 კაცი მირტყამდა, 2 ნეკნი ჩამიმტვრიეს”, - ამბობს ლომიძე და ამატებს, რომ ჩვენება კარნახით დაწერა და ხელიც ისე მოაწერა, რომ არ გაუპროტესტებია, რადგან იცოდა წინააღმდეგობის გაწევის შემთხვევაში უარესი დაემართებოდა.

ლომიძეს 30-დღიანი ადმინისტრაციული პატიმრობა მიესაჯა.

- ”მხოლოდ სასამართლოზე გადაწყვეტილების გამოცხადების შემდეგ ვთქვი, რომ 26 მაისს მიტინგზე ყოფნის გამო დამაკავეს, - აცხადებს ლომიძე და დაცვის მხარის შეკითხვას, თუ რატომ არ გაასაჩივრა გათავისულფების შემდეგ თავისულფების უკანონოდ აღკვეთისა და ცემის შესახებ კითხვითვე პასუხობს - ვისთან გამესაჩივრებინა, სააკაშვილთან თუ კუბლაშვილთან?! რა აზრი ჰქონდა?!”

ასევე დაცვის მხარის შეკითხვებს იმის შესახებ, თუ რატომ არაფერი თქვა მან დაკავებმადე ან დაკავების შემდეგ ნეკნების ჩამტვრევის შესახებ ექიმთან, ან არსებობს თუ არა ერთი ადამიანი მაინც ვინც დაადსტურებს, რომ მას ხვედელიანი ურტყამდა პასუხობს: ”რომ მეთქვა ნეკნები მაქვს ჩამტვრეულიო გამომიშვებდნენ?!”

რაც შეეხება მოწმის არსებობას, ლომიძე ამბობს, რომ ამას არც ერთი პოლიციელი არ დაადასტურებს.

ლომიძის შემდეგ ჩვენება ბორჯომის პოლიციის უფროსის მოადგილემ ბორის ლაზარაშვილმა მისცა. ასევე დაიკითხნენ პოლიციის თანამშრომლები მანუჩარ ჭყოიძე, დავით ბლიაძე, დავით იჩხიტიძე და ევგენი მელიოხინი. მათ პოლიციაში ლომიძის ცემის ფაქტი არ დაუდასტურებიათ და როგორც პროცესზე განაცხადეს ლომიძეს გარეგნულად ცემის კვალი არ აღენიშნებოდა.

როგორც პროცესზე განსასჯელმა ხვედელიანმა განაცხადა და ყველა დაკითხული თანამშრომელიც დაეთანხმა, პოლიციაში მის მიერ ჩატარებული ყველა თათბირი იმაზე საუბრით იწყებოდა, რომ არასდროს არვისთვის არ დაერტყათ.

მომავალი პროცესი 8 აპრილამდე გადაიდო, დანარჩენები 15 და 23 აპრილს ჩაინიშნა.

[თამუნა უჩიძე, ახალციხე]