მთავარი ბრალდებულის, ხვედელიანის მონოლოგი სასამრთლო პროცესზე

ბორჯომის პოლიციის ყოფილი უფროსის მამუკა ხვედელიანის სასამართლო პროცესი, როგორც ყოველთვის, დღესაც 5 საათს გააგრძელდა. პროცესზე ბრალდებულის გიორგი ლომიძის შემდეგ ხვედელიანი დაიკითხა. სასამართლოში ბრალდებულის დაკითხვა, სწორედ ხვედელიანით დასრულდა.

იგი ”ნაციონალური მოძრაობის” მაჟორიტარი დეპუტატობის კანდიდატი გახლდათ ბორჯომში და ბრალი 6 ეპიზოდში ედება.

ხვედელიანის დაკითხვა 14:00 საათზე დაიწყო და 16:00 საათზე დასრულდა. მისი მონოლოგი საათნახევარს გაგრძელდა. ბრალდებულმა საუბარი ბიოგრაფიით დაიწყო და განსაკუთრებული აქცენტი 2008 წლის აგვისტოს ომში მონაწილეობასა და წლების განმავლობაში შსს ორგანოებში საკუთარ დამსახურებებზე გააკეთა.

ბიოგრაფიის მოყოლამდე ხვედელიანმა სხვა ბრალდებულებსა და მათი ოჯახის წევრებს ბოდიში მოუხადა: ”ეს ადამიანები ჩემი სახელისა და გვარის, მამუკა ხვედელიანის პატიმრები არიან. მადლობა თქვენ, რომ არ დაიბრალეთ და არც მე დამაბრალეთ ის, რაც არ მომხდარა”.

ხვედელიანის განცხადებით, ყველა დანაშაულის გახსნაში თავად ღებულობდა მონაწილეობას, გახსნილი დანაშაულებების რაოდენობა კი 96 პროცენტს შეადგენდა და ასეთი მაჩვენებელი საქართველოს მასშტაბით არავის ჰქონდა. ამიტომ მრავალჯერ აქვს მიღებული ფულადი პრემია და არაერთი მედალი: ”აგვისტოში ტანკები რომ შემოვიდა ბორჯომში, მე გადავუდექი წინ, ამიტომ მომცეს პოლიციის პოლკოვნიკის წოდებაც. ცხინვალში ომში მონაწილებისთვის კი ვახტანგ გორგასლის ორდენით დამაჯილდოეს”.

მისი თქმით, ბორჯომის ტყე აგვისტოში იმიტომ გადაწვეს, რომ მაშინ მას აქ ტანკები ჰყავდა დამალული: ”ისე გამოვზიდეთ იქიდან ყველაფერი, რომ ერთი ტყვიაც კი არ დაგვიკარგავს. ჩემს გვერდით დაჭრეს მაშინ სამცხე-ჯავახეთის სამხარეო მთავარი სამმართველოს უფროსი ივანე წიკლაური. სწორედ ამის შემდეგ ომიდან ბევრი პოლიციელი გამოიქცა”.

ხვედელიანი ამბობს, რომ სამცხე-ჯავახეთის სამხარეო მთავარ სამმართველოში ბევრ პოლიციელს აღნიშნულის გამო პატივს აღარ სცემდა: ”მათ შორის ერთ-ერთი იყო ის, ვინც ბრალდებულების ამოცნობისას ვიდეოს იღებდა, მაგრამ ოქმში მისი სახელი და გვარი არ შეიტანეს. აქვე მინდა აღვნიშნო, რომ გამომძიებლის გელა მაღრაძის ოჯახის სამი წევრი ჩემი პოლიციის უფროსობის პერიოდში დავაკავეთ. ამიტომ ამ პირებს ჩემთან გარკვეული ანგარიშსწორების სურვილი ჰქონდათ”.

იგი თავს პოლიტპატიმრად მიიჩნევს და ამბობს, რომ იმ დანაშაულის შესახებ, რომელშიც მას ბრალს დებენ, ჭორის დონეზეც რომ სცოდნოდა საქმეს ბოლომდე გამოიძიებდა და ყველა დამნაშავეს სათანადოდ დასჯიდა: ”ყველა ბრალდება თითიდან გამოწოვილი და შეთითხნილია. ციხეში მამაო შემოდის და მეუბნება, რომ ადამიანები, რომლებიც ჩემს წინააღმდეგ სასამართლოში ჩვენებას აძლევენ ბოდიშს მიხდიან. მაგრამ ბოდიში უშველის საქმეს?!”

ხვედელიანი მონოლოგში მის წინააღმდეგ სასამართლოსთან გამართულ აქციასაც შეეხო და განაცხადა, რომ ადამიანები რომლებიც ტრანსფარანტებით ხელში მის დასჯას ითხოვდნენ, მანამდე სანამ ხელისუფლება შეიცვლებოდა, მას ფეხქვეშ ეგებოდნენ: ”ხომ თავისუფალია სასამართლო პროცესზე დასწრება, შემოვიდნენ და ნახონ, რომ ჩემს წინააღმდეგ ერთი მტკიცებულებაც კი არ არსებობს”.

ხვედელიანი ამბობს, რომ პროკურორზე ნაწყენი არ არის: ”რა ბინძური საქმეც შეუტანეს, ის წარადგინა სასამართოში. ერთი პირდაპირი მოწმე მაინც მინახონ და 14-ვე ბრალდებას ვაღიარებ”.

წინააღმდეგ შემთხვევაში ხვედელიანი აცხადებს, რომ მას ვინც ეს ყველაფერი მის წინააღმდეგ დაგეგმა, სიცოცხლის ბოლომდე არ აპატიებს: ”კანონის ფარგლებში, მაგრამ სიცოცხლის ბოლომდე ვანანებ”.

ხვედელიანს საათნახევრიანი მონოლოგის დასრულებისას დარბაზში დამსწრე გულშემატკივრებმა ტაში დაუკრეს, რის გამოც მოსამართლემ არაერთ პირს დარბაზი დაატოვებინა.

დაცვის მხარეს ბრალდებულთან კითხვები არ ჰქონია. პროკურორმა კი კითხვის დასმამდე აღნიშნა, რომ ჩვენების დიდ ნაწილში ხვედელიანი საკუთარ ღირსებებზე საუბრით დაკავდა. ნახევარი საათის განმავლობაში ბრალდების მხარე მხოლოდ რამდენიმე დამაზუსტებელი კითხვით შემოიფარგლა.

მთავარი ბრალდებულის დაკითხვის შემდეგ სასამართლო პროცესზე წერილობითი მტკიცებულებების გამოკვლევა დაიწყო.

ხვედელიანი მე-6 თვეა რაც დაკავებულია, ამ ხნის განმავლობაში 10-ზე მეტი სასამართლო პროცესი გაიმართა, სავარაუდოდ გადაწყვეტილების გამოტანამდე მხოლოდ ერთი პროცესიღა დარჩა.

[თამუნა უჩიძე, ახალციხე]