ბორჯომში 2018 წლის ბიუჯეტს ამტკიცებენ, სხდომას არ ესწრება 'ქართული ოცნება'

მთავარი → სიახლე, ეკონომიკა 27.12.2017

ბორჯომში საკრებულოს სხდომა მიმდინარეობს, რომლის პირველი საკითხი 2018 წლის ბიუჯეტის დამტკიცებაა. 28 დეპუტატიდან, სხდომას მხოლოდ ოპოზიციის 15 წევრი ესწრება, "ქართული ოცნების" დეპუტატები, რომლებმაც პირველივე სხდომა პროტესტის ნიშნად დატოვეს, არც ამ შეხვედრას ესწრებიან.

ბორჯომში 2018 წლის ბიუჯეტს ამტკიცებენ, სხდომას არ ესწრება 'ქართული ოცნება'

ბორჯომის საკრებულოს დეპუტატებმა, დღევანდელ სხდომაზე, დღის წესრიგის მიხედვით, 6 საკითხია.

მათ შორის: დეპუტატებმა უნდა განიხილონ და დაამტკიცონ 2018 წლის ბიუჯეტი; უნდა იმსჯელონ ბორჯომში, რეგიონებში განსახორციელებელი პროექტების ფონდიდან დასაფინანსებელი პროექტების შესახებ; უნდა იმსჯელონ: ადგილობრივ მოსაკრებლებზე, ბაკურიანში ქუჩების სახელდების მინიჭებაზე, მუდმუვმოქმედ კომისიაში უნდა შეიტანონ ცვლილება და ცნობად უნდა მიიღონ ფრაქციების დაფუძნება. ფრაქციებს შორის კი იქნება "ქართული ოცნების" ფრაქციების შექმნა, ვინაიდან, მიუხედავად პროტესტისა და ასევე, მუხედავად იმისა, რომ არჩევნებიდან დღემდე, არცერთ სხდომას არ დასწრებიან, "ქართული ოცნების" დეპუტატებს საკრებულოში სამი ფრაქციის შექმნა სურთ და 25 დეკემბერს საკრებულოში შესაბამისი განაცხადიც შეიტანეს.

შეგახსენებთ, რომ ბორჯომის საკრებულო, საქართველოს მასშტაბით ერთადერთი საკრებულოა, სადაც მმართველ პარტია "ქართულ ოცნებას" უმრავლესობა არ ჰყავს. ბორჯომის საკრებულოს 28 დეპუტატიდან, 13 "ქართულ ოცნებას", 15 კი ოპოზიციას წარმოადგენს. და ასევე, საინტერესოა ისიც, რომ 15 ოპოზიციონერი დეპუტატიდან, 11 "პატრიოტთა ალიანსის" წევრია.

პოლიტიკურ ძალთა გადანაწილება ბორჯომში:

1. „ქართული ოცნება“ – 13 დეპუტატი;
2. „პატრიოტთა ალიანსი“ – 11 დეპუტატი;
3. „ნაციონალური მოძრაობა“ – 2 დეპუტატი;
4. „ევროპული საქართველო“ – 1 დეპუტატი;
5. „ლეიბორისტული პარტია“ – 1 დეპუტატი.

გარდა ამისა, ბორჯომში, საკრებულოსაც ოპოზიციური პარტიის წევრი, მერობის ყოფილი კანდიდატი, ზაზა ჩაჩანიძე ხელმძღვანელობს. მიმდინარე წლის 20 ნოემბერს, საკრებულოს პირველი სხდომა ბორჯომში, ცხრა საათის განმავლობაში, ხმაურისა და დაპირისპირების ფონზე მიმდინარეობდა. საბოლოოდ, „ოცნების“ წევრმა დეპუტატებმა სხდომა დატოვეს და საკრებულოს თავმჯდომარე მხოლოდ ოპოზიციური პარტიების წარმომადგენლებმა აირჩიეს. ამის გამო „ოცნების“ დეპუტატები სამართლებრივად დავას აანონსებდნენ, თუმცა ვადა ისე ამოიწურა, რომ სასამართლოს არ მიმართეს.

დღეს ბორჯომში რიგით მეოთხე სხდომა იმართება და ამათგან, "ქართული ოცნების" წევრები, არცერთ სხდომას არ დასწრებიან.

[თინათინ ზაზაძე, ნინო ნარიმანიშვილი, ბორჯომი]