სასამართლო ბორჯომის საკრებულოს ფრაქციების საქმის განხილვას იწყებს

ფრაქციების საქმეს მოსამართლე გია ბერაია განიხილავს. დღეს ამ საქმეზე პირველი სხდომა იმართება.

ბორჯომის მუნიციპალიტეტის საკრებულოს ექვსმა დეპუტატმა ახალციხის რაიონულ სასამართლოში საჩივარი 19 თებერვალს შეიტანა. სასამართლოში ის დეპუტატები დავობენ, რომლებსაც საკრებულოში ორი ფრაქციის „ქართული ოცნება – კონსერვატორები“ და „ქართული ოცნება – მრეწველების“ შექმნაზე საკრებულომ უარი უთხრა .

ამ ექვსი დეპუტატიდან, სამმა, იმისათვის, რომ სხვა ფრაქცია შეექმნა, პარტია „ქართული ოცნება“ დატოვა. ერთი მათგანი „კონსერვატორებში“ გადავიდა, ორი კი „მრეწველებში“. მიუხედავად ამისა, ბორჯომის საკრებულოს უმრავლესობამ, რომელსაც ოპოზიციური პარტიები წარმოადგენენ, დეპუტატებს ფრაქციები არ დაურეგისტრირა.

საკრებულოში უარი იმ მოტივით განმარტეს, რომ ამ ფრაქციების შექმნა კანონთან შესაბამისობაში არ არის, რადგან მისი წევრები რეალურად „ქართული ოცნების“ დეპუტატები არიან. ერთი და იგივე პარტიის წარმომადგენლებს კი მხოლოდ ერთ ფრაქციაში აქვთ გაწევრიანების უფლება.

შეგახსენებთ, ბორჯომში საქართველოს მასშტაბით ერთადერთი საკრებულოა, სადაც უმრავლესობაში ოპოზიციური პარტიების დეპუტატები არიან. ოპოზიციური პარტიიდან, "პატრიოტთა ალიანსიდანაა" საკრებულოს თავმჯდომარე ზაზა ჩაჩანიძეც.

ამ ფაქტის გამო, დაახლოებით ოთხი თვის განმავლობაში "ქართული ოცნების" დეპუტატები, ბოიკოტის ნიშნად, საკრებულოს არცერთ სხდომას არ დასწრებიან. მათ შორის, არც იმ სხდომას, რომელზეც ფრაქციების შექმნის საკითხი განიხილებოდა.

[sknews.ge]