‘ოცნებამ’ არ იცის შევა თუ არა ბორჯომის საკრებულოში, თუმცა ფრაქციებს ქმნის

ბორჯომის მუნიციპალიტეტის ახალი მოწვევის საკრებულოში ამ დრომდე სამი სხდომა გაიმართა, თუმცა „ქართული ოცნების“ წევრი დეპუტატები არცერთს არ დასწრებიან. საკრებულოს თავმჯდომარის ზაზა ჩაჩანიძის განცხადებით კი გუშინ, 25 დეკემბერს, მათ საკრებულოს სამი ფრაქციის შექმნის შესახებ განცხადებით აცნობეს.

„13–ნი არიან და სამ ფრაქციას ქმნიან. ამ საკითხს კენჭისყრა და განხილვა არ სჭირდება. საკრებულო მათ განცხადებას ცნობად მიიღებს“, – ამბობს ჩაჩანიძე.

მომავალი საკრებულოს სხდომა ბორჯომში ხვალ, 27 დეკემბერს 12:00 საათზე გაიმართება. დეპუტატებმა მომავალი წლის ბიუჯეტი საბოლოოდ უნდა განიხილონ და როგორც ჩაჩანიძე ამბობს, შესაძლოა დაამტკიცონ კიდეც. თუმცა, დაესწრებიან თუ არა „ოცნების“ წევრები სხდომას, უცნობია.

„შემოვლენ თუ არა საკრებულოში, არ ვიცი, რეალურად რაც ვიცი და ჩანს, არის ის, რომ ხელფასების აღება უნდათ“, – აცხადებს ჩაჩანიძე.
შეკითხვაზე შევლენ თუ არა საკრებულოში, „ოცნების“ დეპუტატები გვპასუხობენ, რომ ეს საკითხი ჯერ გადაწყვეტილი არ არის. როგორც მათ „სამხრეთის კარიბჭესთან“, გუშინ, 25 დეკემბერს, სატელეფონო საუბარში განაცხადეს, სამართლებრივად დავას საკრებულოს თავმჯდომარის არჩევისა და კომისიების დაკომპლექტების საკითხზე აღარ აპირებენ.

„ამ კუთხით პოლიტიკურად ვიდავებთ, თუმცა ჯერ დეტალებზე საუბრისგან თავს შევიკავებ. ჯერ ვერც იმას გეტყვით შევალთ თუ არა საკრებულოში“, – ამბობს ბორჯომის მუნიციპალიტეტის საკრებულოს დეპუტატი „ქართული ოცნებიდან“ გიორგი ფერაძე.

ჩაჩანიძე მიიჩნევს, რომ „ოცნების“ ყველა დეპუტატმა საკუთარ ამომრჩეველს პატივი უნდა სცეს და საკრებულოს მუშაობაში აქტიურად ჩაერთოს: „სწორედ ამომრჩევლის გამო უნდა შემოვიდნენ, თორემ მათი არ მოსვლით მუნიციპალიტეტს არაფერი დააკლდება. ჩვენ კონსტრუქციულები ვიქნებით და ყველა მათგანთან აქტიურად ვიმუშავებთ“.

შეგახსენებთ, რომ 20 ნოემბერს, საკრებულოს პირველი სხდომა ბორჯომში, ცხრა საათის განმავლობაში, ხმაურისა და დაპირისპირების ფონზე მიმდინარეობდა. საბოლოოდ, „ოცნების“ წევრმა დეპუტატებმა სხდომა დატოვეს, ამის შემდეგ კი ოპოზიციური პარტიების წარმომადგენლებმა საკრებულოს თავმჯდომარე აირჩიეს, ასევე კომისიები დააკომპლექტეს. „ოცნების“ დეპუტატები სამართლებრივად სწორედ ამაზე დავას აანონსებდნენ, თუმცა ვადა ისე ამოიწურა, რომ მათ სასამართლოს არ მიმართეს.

[თამუნა უჩიძე, ბორჯომი]