‘ოცნებას’ ბორჯომის საკრებულოში სამი ფრაქციიდან მხოლოდ ერთი დაურეგისტრირეს

„ქართული ოცნების“ დეპუტატებმა, ბორჯომის მუნიციპალიტეტის საკრებულოს, ფრაქციების დარეგისტრირების მოთხოვნით, 25 დეკემბერს მიმართეს. „ოცნება“ სამი ფრაქციის შექმნას გეგმავდა: „ქართული ოცნება– დემოკრატიული საქართველო“, „ქართული ოცნება – კონსერვატორები“ და „ქართული ოცნება – მრეწველები“.

დღეს, 27 დეკემბერს გამართულ საკრებულოს სხდომაზე, სადაც დეპუტატებს, ფრაქციის შექმნის შესახებ განცხადება ცნობად უნდა მიეღოთ, ცნობილი გახდა, რომ მმართველი გუნდს მხოლოდ ერთი ფრაქცია ექნება – „ქართული ოცნება– დემოკრატიული საქართველო“.

საკრებულოს იურიდიული კომისიის თავმჯდომარის ტატიანა მარტკინენკოს განმარტებით, დანარჩენი ორი ფრაქციის შექმნა კანონთან შესაბამისობაში არ იყო: „მრეწველებში“ წევრები დამატებული არიან „ქართული ოცნებიდან“, ასეა „კონსერვატორებშიც“. ერთი და იგივე პარტიის წარმომადგენლებს კი მხოლოდ ერთ ფრაქციაში აქვთ გაწევრიანების უფლება“.

შეგახსენებთ, ბორჯომის საკრებულოში უმრავლესობა ოპოზიციურ პარტიებს აქვთ, „ქართული ოცნება“ კი ამ დრომდე საკრებულოში გამართული ოთხი სხდომიდან არცერთს დასწრებია. პირველი სხდომა „ოცნების“ დეპუტატებმა პროტესტის ნიშნად დატოვეს და ოპოზიციის მიერ დაკომპლექტებული საკრებულოს ლეგიტიმურობას არ აღიარებენ. აქვე შეგახსენებთ, ბორჯომში, საკრებულოს თავმჯდომარეც ოპოზიციური პარტიის წარმომადგენელია.

[თინათინ ზაზაძე, ბორჯომი]