ბორჯომში „ოცნების“ სამმა დეპუტატმა პარტია დატოვა

ბორჯომის საკრებულოს ოპოზიციონერი დეპუტატები აცხადებენ, რომ აღნიშნულმა დეპუტატებმა პარტია „ქართული ოცნება“ საკრებულოში ახალი ფრაქციების შექმნის მიზნით დატოვეს.


„პარტიები შეიცვალეს იმის გამო, რომ ახალი ფრაქციის შექმნის შესაძლებლობა ქონოდათ. საკრებულოს ფრაქციის თავმჯდომარე ვარლამ ხვინგიამ მოიტანა ყველა დოკუმენტი“, – განაცხადა სატელეფონო საუბარში ბორჯომის საკრებულოს იურიდიული კომისიის თავმჯდომარემ ტატიანა მარტინენკომ.

მისი თქმით, პარტია „ქართული ოცნება“ დატოვა ანდრო გედიაშვილმა, ივანე შალუტაშვილმა და ოთარ არბოლიშვილმა. ანდრო გედიაშვილი „კოსერვატორებში“ გადავიდა ხოლო ივანე შალუტაშვილი და ოთარ არბოლიშვილი „მრეწველებში“.

შეგახსენებთ, რომ მმართველი გუნდის დეპუტატები ბორჯომის საკრებულოში სამი ფრაქციის „ქართული ოცნება– დემოკრატიული საქართველოს“, „ქართული ოცნება – კონსერვატორების“ და „ქართული ოცნება – მრეწველების“ შექმნას ითხოვდნენ, თუმცა საკრებულომ 27 დეკემბრის სხდომაზე მხოლოდ ერთის – „ქართული ოცნება– დემოკრატიული საქართველოს“ შექმნა მიიღო ცნობად. დანარჩენი ორი იმის გამო არ დაარეგისტირეს, რომ ფრაქციაში სხვადასხვა პარტიის წევრები იყვნენ შესულები.


„ქართული ოცნების“ პარტიის დატოვებასთან დაკავშირებით საუბარი არ ისურვა ივანე შალუტაშვილმა. კომენტარზე უარი განაცხადა ირაკლი კვირკველიამაც, რომელიც ფრაქცია„ქართული ოცნება–დემოკრატიული საქართველოს“ თავმჯდომარეა: "არ ვიცი საქმის კურსში არ ვარ".

ბორჯომის საკრებულოში რიგგარეშე სხდომა 18 იანვარს ჩაინიშნა.

შეგახსენებთ, ბორჯომის საკრებულოში უმრავლესობა ოპოზიციურ პარტიებს აქვთ, „ქართული ოცნება“ კი ამ დრომდე საკრებულოში გამართული ოთხი სხდომიდან არცერთს დასწრებია. პირველი სხდომა „ოცნების“ დეპუტატებმა პროტესტის ნიშნად დატოვეს და ოპოზიციის მიერ დაკომპლექტებული საკრებულოს ლეგიტიმურობას არ აღიარებენ. აქვე შეგახსენებთ, ბორჯომში, საკრებულოს თავმჯდომარეც ოპოზიციური პარტიის წარმომადგენელია.

[თინათინ ზაზაძე, ბორჯომი]