ადიგენში სტიქიისგან მიყენებული ზარალის ოდენობა ჯერ უცნობია

ადიგენის გამგეობაში ამბობენ, რომ ზარალის დამთვლელი კომისია სხვადასხვა მიმართულებებით მუშაობს, თუმცა, ასე ცოტა დროში, რაიმე მონაცემზე საუბარი ნაადრევია.

„ჯერ დეფექტური აქტები დგება, გავიგოთ სად რა ზიანი მიადგა, მერე დავითვლით და შევაფასებთ“, -ამბობს ადიგენის მუნიციპალიტეტის გამგებელი ზაქარია ენდელაძე.

სტიქიის ზონაში ზარალის დამთვლელი კომისიის ოთხი ჯგუფი მუშაობს. ამათგან, ორი ინფრასტრუქტურის, ორი კი სოფლის მეურნეობის მიმართულებით ითვლის სტიქიისგან მიყენებულ ზარალს.

„გამგეობის ყველა სამსახური გვეხმარება“, - ამბობს ადიგენის გამგებელი ზაქარია ენდელაძე.

მისი ინფორმაციით, 6 სოფელი: ვარხანი, უნწა, ბენარა, არალი, უდე და ფხერო სტიქიამ ყველაზე მეტად დააზიანა. ზარალის დამთვლელი კომისიაც პირველ რიგში, ამ ტერიტორიებზე მუშაო ს:„რაც შეეხება სხვა სოფლებს, იქ ნაკლები ზიანი აქვთ“.

შეგახსენებთ, გუშინ, 29 მაისს, მოსულმა ძლიერმა წვიმამ და წვიმისგან ადიდებულმა მდინარეებმა და ღელეებმა, ადიგენში 9 სოფელი დააზარალა. აქედან ყველაზე დიდი ზიანი სოფელ ვარხანს მიადგა, სდაც დაიტბორა სახლები და საქონლის სადგომები, განადგურდა ნათესები. ადიდებულმა წყალმა გაიტაცა შინაური ფრინველი და ცხოველი.

სოფელ ვარხანში, მოინგრა ღობეები და დაიტბორა ცენტრალური გზა. ადგილზე მუშაობდნენ საგანგებო სიტუაციების მართვის სამსახური. გზას მძიმე ტექნიკა წმენდდა.

ადიგენის გამგეობაში განმარტავენ, რომ ზარალის დათვლას რამდენიმე დღე დასჭირდება.



[ლუბა გიორგაძე, ადიგენი]