წყალდიდობა ვარხანში: დატბორილია 25–მდე სახლი, დანგრეულია 3 საქონლის სადგომი

ადგილობრივების ინფორმაციით, მოვარდნილმა წყალმა ჯერ დაანგრია და შემდეგ წაიღო ვარხანში მცხოვრები მსხვილიძეების სახლის კედელი. დატბორილ სახლებში დაზიანებულია ავეჯი, სარდაფებში განადგურდა პროდუქტი.

ასევე, წყალმა წაიღო საქონლის სამი სადგომი. მოსახლეობამ ამ სადგომებში მყოფი შინაური ცხოველისა და ფრინველის გადარჩენა ვერ შეძლო. წყალმა წაიღო დახოცილი შინაური ცხოველებისა და ფრინველების ნაწილიც.

ადიგენის მუნიციპალიტეტის გამგეობის გრეიდერი ამ წუთებში სოფლის გზაზე ჩამოტანილ შლამს წმენს. ზარალს ითვლის გამგეობაში შექმნილი სპეციალური კომისია.

შსს–ს საგანგებო სიტუაციების სამსახურის წარმომადგენლები დატბორილი სახლებიდან და სარდაფებიდან წყალს ტუმბავენ.

შეგახსენებთ, დღეს 29 მაისს, ძლიერმა წვიმამ დააზარალა ადიგენის სოფლები: აბასთუმანი, ვარხანი, უნწა, ქიქინეთი, წახანი და ბენარა.
შედარებით ნაკლებად, თუმცა, წვიმამ დააზარალა არალი და უდეც. ადიდებულმა მდინარე ოცხემ და ღელეებმა, დატბორა გზები, სახნავ–სათესი ფართობები და საცხოვრებელი სახლები. ადგილზე სამაშველო სამსახური მუშაობს. შსს–ს ინფორმაციით, წყალდიდობის შედეგად არავინ დაშავებულა.

[ლუბა გიორგაძე, თამუნა უჩიძე ადიგენი]