სტიქიამ ადიგენი 153 324 ლარით აზარალა

29 მაისის სტიქიის შედეგად, ადიგენმა სოფლის მეურნეობის კუთხით 65 150 ლარი, ინფრასტრუქტურის მიმართულებით 88 174 ლარი იზარალა.
სტიქიის შემდეგ შემდგარი სპეციალური კომისია ადიგენის 9 სოფელში ზარალს ერთი კვირის განმავლობაში სწავლობდა.

„როდის მოხდება ზარალის ანაზღაურება არ ვიცი. ჩვენს შესაბამისი უწყებები ჩავაყენეთ საქმის კურსში და ველოდებით, როგორ განვითარდება მოვლენები“,– ამბობს ადიგენის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელი მამუკა კალანდაძე.

შეგახსენებთ, რომ 29 მაისს მოსულმა ძლიერმა წვიმამ და წვიმისგან ადიდებულმა მდინარეებმა და ღელეებმა, ადიგენში 9 სოფელი დააზარალა.

ყველაზე დიდი ზიანი სოფელ ვარხანს მიადგა, სადაც დაიტბორა სახლები და საქონლის სადგომები, განადგურდა ნათესები. ადიდებულმა წყალმა გაიტაცა შინაური ფრინველი და ცხოველი. სოფელ ვარხანში, მოინგრა ღობეები და დაიტბორა ცენტრალური გზა. ადგილზე მუშაობდნენ საგანგებო სიტუაციების მართვის სამსახურის წარმომადგენელები.

[ვარლამ წიკლაური, ადიგენი]