ახალციხისა და ადიგენის მუნიციპალიტეტებში სტიქიით მიყენებული ზარალის აღწერა დასრულდა

ახალციხისა და ადიგენის მუნიციპალიტეტებში სტიქიის შედეგად მიყენებული ზარალის ოდენობა ჯერ უცნობია.

ახალციხის მუნიციპალიტეტის გამგეობაში განმარტავენ, რომ სპეციალურმა კომისიამ სტიქიისგან დაზარალებული სოფლების შემოვლა უკვე დაასრულა. კომისია სტიქიით მიყენებულ ზარალს ითვლის.

ადიგენის მუნიციპალიტეტის გამგეობაში აცხადებენ, რომ თუ რა ოდენობის ზარალი მიადგა ადიგენის მუნიციპალიტეტის სოფლებს კვირის ბოლოს გახდება ცნობილი.

„დაზარალებული სოფლების შემოვლა და ზარალის აღწერა უკვე დავასრულეთ. დღეს დაიწყება ციფრების დათვლა, სავარაუდოდ კვირის ბოლოს ზუსტად გვეცოდინება რა ოდენობის ზარალი მიადგა ადიგენის მუნიციპალიტეტს“, – ამბობს ადიგენის მუნიციპალიტეტის გამგებლის მოადგილე არსენ ბალახაშვილი.

შეგახსენებთ, რომ სტიქიამ ახალციხისა და ადიგენის მუნიციპალიტეტებს ორჯერ შეუტია. 3 ივნისს მოსულმა ძლიერმა სეტყვამ და ქარმა ადიგენის მუნიციპალიტეტის ორი სოფელი უდე და აბასთუმანი დააზარალა. სტიქიამ სასოფლო–სამეურნეო სავარგულები და სოფლის შიდა გზები დააზიანა. 6 ივნისს კი ახალციხის მუნიციპალიტეტის სოფლებში კლდესა და წნისში სეტყვამ ხეხილის 15 პროცენტი დააზიანა.

დაახლოებით ერთ კვირაში, 11 ივნისს, სტიქიამ ადიგენის მუნიციპალიტეტის კიდევ ხუთი სოფელი, დიდი და პატარა სმადა, ენთელი, ლელოვანი და ამხერი დააზარალა. ძლიერმა სეტყვამ და წვიმამ სასოფლო – სამეურნეო სავარგულები და ინფრასტრუქტურა დააზიანა. 11 ივნისს სეტყვა იყო ახალციხის მუნიციპალიტეტში, სადაც 8 სოფელი დაისეტყვა.

[მანანა სარაშვილი, ახალციხე]