სოფელ ვარხანში წყალდიდობისგან მიყენებულ ზარალს ითვლიან [PHOTO]

სოფელ ვარხანში მცხოვრები მსხვილიძეები ამბობენ, რომ სტიქიას შემთხვევით გადაურჩნენ. წვიმის გამო მათ სახლს კედელი მოენგრა.
„საძინებელი ოთახია, კიდევ კარგი, წვიმის დროს აქ არ აღმოვჩნდით, თორემ ვიღაცას მოიყოლებდა“, - გვეუბნება სულხან მსხვილიძე.

მონგრეულმა კედელმა მსხვილიძეებს იმ ოთახში მდგარი ავეჯიც დაუზიანა.



მსხვილიძეების ოჯახს მოვარდნილმა წყალმა შინაური ფრინველი და პირუტყვიც მოსტაცა და მთლიანად დაუტბორა სასოფლო–სამეურნეო სავარგულები: „70-მდე ქათამი წყალმა წაიღო. ხესთან ძროხა და ხბო მყავდა მიბმული, ვერც ისინი გადავარჩინეთ“.

დღეს სოფელ ვარხანში წყალმა ათობით სახლი დატბორა. მოვარდნილმა ნიაღვარმა ორი საქონლის სადგომიც დაანგრია.


სტიქიისაგან მთლიანად დაიტბორა ბიჩახჩიანების სახოვრებლის სარდაფი და პირველი სართული.

„აქედან არაფერი გადარჩება, არ ვიცი რა გვეშელება“, - ამბობს მარინა ბიჩახჩიანი.






საცხოვრებელი სახლებიდან და სარდაფებიდან წყალს შსს–ს საგანგებო სიტუაციების მართვის სამსახურის თანამშრომლები ტუმბავდნენ.



„ორ საათზე მეტია აქ ვმუშაობთ, ალბათ 20-ზე მეტი სახლიდან ამოვტუმბეთ წყალი, რამდენიმე პირუტყვიც გადავარჩინეთ წყლისგან, მაგრამ, ყველა ვერა“, – გვითხრეს მაშველებმა.


ადგილობრივები ამბობენ, რომ რამდენიმე ათეული წელია მსგავსი სტიქია არ ახსოვთ: „ბოლოს ასეთი წყალდიდობა, სახლებში რომ შემოგვივარდა და პირუტყვიც მოგვტაცა, 1947 წელს იყო“.

ნათესების, საქონლის სადგომებისა და საცხოვრებელი სახლების გარდა, დაზიანებულია ღობეები. ნაშალი მასალისგან დაზიანდა ცენტრალური გზა.



ვარხნის მსგავსად დღეს სტიქიამ ადიგენში 9 სოფელი დააზარალა. სტიქიის ზონაში უკვე მუშაობს გამგეობაში სპეციალურად შექმნილი ზარალის დამთვლელი კომისია.

ადიგენის მუნიციპალიტეტის გამგებლის ზაქარია ენდელაძის განმარტებით, სტიქიისაგან ყველაზე დიდი ზარალი სოფელმა ვარხანმა მიიღო: „სხვა სოფლებში, სადაც სტიქია იყო, ძირითადად ნათესებია დაზიანებული. მარტო ვარხანია, სადაც წყალმა სახლებიც დატბორა“.
გამგებელი ამბობს, რომ კომისია ზარალს რამდენიმე დღეში შეისწავლის.



[ლუბა გიორგაძე, ადიგენი]