რაში დაეხმარება ადიგენის გამგეობა სტიქიით დაზარალებულებს

ადიგენის თვითმმართველობის ბიუჯეტიდან მოსახლეობის ღობეების აღსადგენად 32 700 ლარი დაიხარჯება. ასევე, ადგილობრივი ბიუჯეტის თანხით, 5 600 ლარით გაიწმინდა გზებზე ჩამოტანილი ქვა და ღორღი.

„ეს თანხები გამგებლის სარეზერვო ფონდიდან გაიწერა, მისი საერთო ოდენობა მიმდინარე წელს 69 000 ლარია“, – ამბობს ადიგენის მუნიციპალიტეტის გამგებლის მოადგილე არსენ ბალახაშვილი და ამატებს, რომ სხვა კუთხით მიყენებულ ზარალს თვითმმართველობა ვერ აანაზღაურებს, მაგალითად, გამგეობა ვერ გაწვდება ინფრასტრუქტურის მიმართულებით მიყენებულ ზიანს.

სტიქიამ ხიდი ორ სოფელში, არალსა და ვარხანში დააზიანა. ადიგენის მუნიციპალიტეტის გამეობის ინფრასტრუქტურის სამსახურის უფროსის გოდერძი სხირტლაძის თქმით, ხიდების პროექტები უკვე შეიძინეს. მისი თქმით, არლის ხიდის პროექტის ღირებულება დაახლოებით 90 000, ვარხნის ხიდის კი 36 000 ლარია.

როგორც გამგეობაში განმარტავენ ამ პროექტებს დღეს, 29 ივნისს ინფრასტრუქტურის სამინსიტროში გაგზავნიან და დაფინანსებას დაელოდებიან.

რაც შეეხება სოფლის მეურნეობის მიმართულებით მიყენებულ ზარალს, მისი ოდენობა 65 000 ლარს შეადგენს.

„ეს მონაცემები სოფლის მეურნეობის სამინისტროში გავგზავნეთ და არ ვიცით რა იქნება. ზოგადად, მოახლეობის ნათესების ნაწილი აღდგა, პირვანდელთან შედარებით ბევრად უკეთ გამოიყურება, წელს მოსავალს მიიღებენ“, – ამბობს ბალახაშვილი.

შეგახსენებთ, 29 მაისს მოსულმა ძლიერმა წვიმამ და წვიმისგან ადიდებულმა მდინარეებმა და ღელეებმა, ადიგენში 9 სოფელი დააზარალა.

ყველაზე დიდი ზიანი სოფელ ვარხანს მიადგა, სადაც დაიტბორა სახლები და საქონლის სადგომები, განადგურდა ნათესები. ადიდებულმა წყალმა გაიტაცა შინაური ფრინველი და ცხოველი. სოფელ ვარხანში, მოინგრა ღობეები და დაიტბორა ცენტრალური გზა. ადგილზე მუშაობდნენ საგანგებო სიტუაციების მართვის სამსახურის წარმომადგენელები.

[თამუნა უჩიძე, ადიგენი]