ადიგენში სტიქიისგან მიყენებულმა ინფრასტრუქტურულმა ზარალმა 800 000 ლარი შეადგინა

ადიგენის გამგეობაში სპეციალურად შექმნილმა ზარალის დამთვლელმა კომისიამ, სტიქიისაგან მიყენებული ზარალის დათვლა გუშინ, 22 ივნისს დასსრულა, დღეს კი შედეგები რეაგირებისათვის, რეგიონული განვითარებისა და ინფრასტრუქტურის სამინისტროს გადაუგზავნა.

როგორც გამგეობაში განმარტავენ, დათვლილია მხოლოდ ინფრასტრუქტურული ზარალი. რაც შეეხება განადგურებულ ნათესებს, გამგებლის მოადგილის არსენ ბალახაშვილის თქმით ვისაც დაზღვეული ჰქონდა, ზარალს სადაზღვევო კომპანია დაითვლის და აანაზღაურებს კიდეც. იმ ფერმერებს კი ვისაც მიწები დაზღვეული არ აქვთ, თვითონ ვერაფრით დაეხმარებიან.

შეგახსენებთ, რომ ადიგენში ძლიერი სტიქია 10 ივნისს მოხდა. რის შედეგადაც მუნიციპალიტეტის ოთხი სოფელი: ვარხანი, ბენარა, უნწა და სოფელი აბასთუმანი დააზარალა. დაიტბორა სასოფლო–სამეურნეო ნათესები, სახლები და ეზოები, დაიხოცა შინაური ცხოველი და ფრინველი.

ადიდებული ხევებისა და მოვარდნილი ნიაღვრებისაგან დააზიანდა ვარხნის ორი და ბენარის ერთი ხიდი. ასევე სოფელ უნწის ხიდი, რომელიც სოფელს ცენტრალურ გზასთან და მიმდებარე სოფლებთან აკავშირებს.

გამგეობაში ამბობენ, რომ ხიდების პირველადი შეკეთება მოხდა, მათი სრული რეაბილიტაციისათვის კი ტენდერი გამოცხადდება.

[ლუბა გიორგაძე, ადიგენი]