წყალდიდობა არალში – 50 ჰექტარზე ნათესები დაიტბორა [PHOTO/VIDEO]

ადიდებულმა მდინარე ოცხემ არალში ათობით ოჯახი მოსავლის გარეშე დატოვა. ადგილობრივების თქმით, კალაპოტიდან გადმოსულმა წყალმა 50 ჰექტარზე მეტი ტერიტორია დატბორა. მთლიანად განადგურებულია ხეხილის ბაღები და კარტოფილის ნათესები.

„გაფუჭებულია ყველაფერი, აქედან ერთი კარტოფილიც არ გამოდგება. წელს არც ხეხილი გვექნება“, - ამბობს სიმონ თათეშვილი.

არალელები ამბობენ, რომ ძლიერი წვიმის გარდა, სოფელში სეტყვაც იყო თუმცა, ძლიერი არა. მათ ნათესებს ზიანი ადიდებულმა ოცხემ მიაყენა.

„20 მეასედი კარტოფილი მეთესა, აღარაფერი გადარჩება“, - გვეუბნება არლის მკვიდრი ზურა ჩილინგარაშვილი.


არალში მცხოვრების მიერ გამოგზავნილი ვიდეომასალა

დღეს ძლიერმა წვიმამ და წყალდიდობამ ადიგენში 10–მდე სოფელი დააზარალა: აბასთუმანი, ვარხანი, უნწა, ქიქინეთი, წახანი, ბენარა, არალი, უდე და ზანავი. დაიტბორა სახლების პირველი სართულები, სარდაფები, დაინგრა საქონლის სადგომები, დაიხოცა შინაური ფრინველი და ცხოველი. ზარალს კომისია სწავლობს.













[ლუბა გიორგაძე, ადიგენი]