აწყურში სტიქიისგან მიყენებულ ზარალს ითვლიან

ახალციხის მუნიციპალიტეტის გამგეობის წარმომადგენლები აწყურში დაზარალებულ მოსახლეობას შეხვდნენ. ადგილობრივები ამბობენ, რომ რაც წინა სტიქიის დროს გადარჩა ხეხილი და ნათესები, ამჯერად სულ განადგურდა.

თუმცა, ახალციხის მუნიციპალიტეტის გამგეობაში განმარტავენ, რომ სასოფლო–სამეურნეო ზარალს ბიუჯეტი ვერ აანაზღაურებს. კომისიაც ზარალს მხოლოდ ინფრასტრუქტურის კუთხით დაითვლის.

„ჩვენ დავითვლით მხოლოდ იმ ზარალს, რომელიც ინფრასტრუქტურის კუთხით მიადგა სოფელ აწყურს. რაც შეეხება სასოფლო – სამეურნეო სავარგულებს, ამ კუთხით ზარალის დათვლა ჩემს კომპეტენციაში არ შედის“, – ამბობს ნოდარ ბალახაშვილი.

შეგახსენებთ, რომ 20 ივნისს სოფელი აწყური მეორედ დაისეტყვა. ძლიერმა წვიმამ და სეტყვამ სოფლის შიდა გზები და სასოფლო – სამეურნეო სავარგულები დააზიანა. ადიდდა ღელეები, თუმცა გზები ჩაკეტვას გადაურჩა. წვიმამ 10 დღის წინ მომხდარი სტიქიის შემდეგ მოხრეშილი გზებიც დააზიანა.

[მანანა სარაშვილი, ახალციხე]