‘ახალციხის ციხის’ გიდები ივლისში ასაღებ დანამატს ოქტომბერში მიიღებენ

„ახალციხის ციხის“ დირექტორის დროებით მოვალეობის შემსრულებლის ილია სიდამონიძის განცხადებით, გამოინახა ის თანხა, რომელიც გიდებს ივლისში უნდა მიეღოთ და ამიტომ ნოემბრის ნაცვლად, მათ დაპრიებული დანამატი ოქტომბერში დაერიცხებათ.

მისივე თქმით, ყველა თანამშრომელს სექტემბრის ბოლოს შეწყვეტილი ხელშეკრულება ოქტომბრის ბოლომდე გაუგრძელდა, მაგრამ რა იქნება ოქტომბრის შემდეგ, ჯერ გაურკვეველია: „ეს დამოკიდებულია იმაზე, თუ რა თანხა შემოვა, როგორ დავფარავთ კომუნალურ ხარჯებს. ახლა ბილეთებიც დასაბეჭდია, მოკლედ, იმას ვინც ხელშეკრულებითაა აყვანილი, დავტოვებთ იანვრამდე თუ ვერა, შემოსული თანხის რაოდენობა განსაზღვრავს“.

გარდა ხელშეკრულებების გაგრძელებისა, „ახალციხის ციხის“ გიდები ახალციხის მერთან გიორგი კოპაძესთან შეხვედრასაც ელოდებიან. მათ ქალაქის მერს არსებული ვითარების შესახებ წერილი მისწერეს.

შეხვდება თუ არა მერი გიდებს, უცნობია. ახალციხის მერიის საზოგადოებასთან ურთიერთობის სამსახურში განაცხადეს, რომ „წერილი განხილვის პროცესშია, მერს ახლა ძალიან დატვირთული გნარიგი აქვს“.

რაც შეეხება მუზეუმის დარბაზის მეთვალყურეებს, „ახალციხის ციხეში“ აცხადებენ, რომ ზამთარში დარბაზში მხოლოდ მუზეუმის მეთვალყურეების მუშაობა საკმარისი იქნება.

შეგახსენებთ, რომ „ახალციხის ციხის“ თანამშრომლები არანორმირებულ სამუშაო განრიგზე, დაბალ ანაზღაურებასა და მოკლევადიან ხელშეკრულებებზე ჩივიან. მათი თქმით, ყოველი წლის ბოლოს, ზამთრის მოახლოებისას, სამსახურიდან გათავისუფლების მოლოდინი აქვთ

[თამუნა უჩიძე, ახალციხე]