ახალციხის ციხის გიდი: ‘ყოველი წლის ბოლოს, ფაქტობრივად, ტერორის ქვეშ ვართ’

ამ თემაზე გიდები და ციხის დირექტორის დროებით მოვალეობის შემსრულებელი ‘სამხრეთის კარიბჭეს’ ყოვლკვირეულ გადაცემა, „კვირის აქცენტში“ საუბრობენ.

ახალციხის ციხე 7ჰექტარ ტერიტორიას მოიცავს. სიუჟეტში, რომელიც გადაცემაში გავიდა, გიდები ამბობენ, რომ დღეში რამდენიმე ექსკურიას უძღვებიან, მთელ დღეს ღია ცის ქვეშ, წვიმაში, თოვლში ატარებენ, ანაზღაურება კი 320 ლარი აქვთ. გარდა ამისა, ვინაიდან ხელშეკრულებით მუშაობენ, მუდმივად გათავისუფლებით ემუქრებიან.
„ყოველი წლის ბოლოს, რაც ეს ციხე არსებობს, ფაქტობრივად ტერორის ქვეშ ვართ, რომ აი შეგამცირებთ, წახვალთ, შტატაზე არ ხართ და ხელშეკრულებით ხართ. ეს არის მორალური და ფსიქოლოგიური ტერორი, რომლიც ხორციელდება გიდებზე, - თქვენ არ ხართ საჭირო ზამთრის განმავლობაში და უნდა წახვიდეთ“, - ამბობს ახალციხის ციხის გიდი დალი გოგოლაძე.

ახალციხის ციხის დირექტორის დროებით მოვალეობის შემსრულებელი ილია სიდამონიძე ამბობს, რომ ციხეს ყველა სეზონზე ამდენი გიდი არ სჭირდება. საერთოდ, ციხეზე კადრები გაბერილია და საჭიროა დაითვალოს, რამდენი თანამშრომელი სჭირდება ციხეს რეალურად. ამას უკავშირდება, ხელშეკრულებით აყვანილი თანამშრომლების გაშვებაც.

„საჭიროდ არ ვთვლი, რომ ზამთარში ვინმემ ტყუილად ხელფასი აიღოს“, - ამბობს გადაცემაში სიდამონიძე და განმარტავს, რომ მომავალშიც ხელშეკრულებით აიყვანენ თანამშრომლებს სეზონურად.
წამყვანის კითხვაზე, ამ ლოგიკით, თუ ითვალისწინებენ მაგალითად გიდების დატვირთულ სამუშაოს ტურისტულ სეზონზე და ეს თუ აისახება მათ ანაზღაურებაზე, სიდამონიძე ამბობს, რომ გიდებისთვის სახელფასო დანამატი წელს ჩასმული აქვთ ბიუჯეტში.

ამავე გადაცემაში ახალციხის მერი გიორგი კოპაძე ამბობს, რომ ზამთარში ციხეს 14 გიდი არ სჭირდება: „თანამშრომელთა სახელშეკრულებო სისტემა უნდა ააწყოს ციხის ადმინისტრაციამ. გიდბს ხელფასი უნდა გაეხარდოთ ისე, რომ ზამთარში რასაც არ იმუშავებენ, ამის ანაზღაურება მოხდეს“.

დეტალურად ამ თემაზე, შეგიძლიათ იხილოთ „სამხრეთის კარიბჭეს“ გადაცემაში „კვირის აქცენტი“, გადაცემის თემაა: „ახალციხის ციხის პრობლემები“.

[ნინო ნარიმანიშვილი, ახალციხე]