ვალეში მიმდინარე მოვლენებზე BP პასუხისმგებლობას კონტრაქტორს აკისრებს

კომპანია Bp-ის საზოგადოებასთან ურთიერთობის სამსახურში „სამხრეთის კარიბჭეს“ განუცხადეს, რომ კომანია bp–ს მხრიდან მათზე ზოგადი ზედამხედველობა ხორციელდება. ის პრობლემები, რაც მუშებს აწუხებთ, კომპანია "ბეხტელ & ენკა"–ს მოსაგვარებელია.

„Bp ახორციელებს ზოგად ზედამხედველობას. რაც შეეხება ამ პრობლემების მოგვარებას, ეს კონტრაქტორის პასუხისმგებლობას წარმოადგენს“, – განაცხადა კომპანია Bp-ის საზოგადოებასთან ურთიერთობის სამსახურის წარმომადგენელმა თამილა ჩანტლაძემ.

"ბეხტელ & ენკა"–ს საზოგადოებასთან ურთიერთობის სამსახურის წარმომადგენელმა გიორგი კურტანიძემ კი გვითხრა, რომ მომხდარზე საუბარი მისი კომპეტენცია არაა: „მე მითხრეს, რომ ვარ საზოგადოებასთან ურთიერთობის სამსახური, რაც ხდება შენ არ გეხებაო. მიმართეთ ჩემს უფროსებს“.

„მის უფროსებს“ „სამხრეთის კარიბჭე“ დღეს ვერ დაუკავშირდა. ისინი, ვინც ვალეში, იმყოფებოდნენ, ჟურნალისტების გამოჩენისთანავე შენობაში შევიდნენ და გარეთ აღარ გამოსულან.

მიუხედავად ამისა, „სამხრეთის კარიბჭე“ ისევ ცდილობს მშენებელი კომპანიიდან ვინმესთან დაკავშირებას და თუ კომუნიკაცია შედგა, მათ პოზიციას მომხდარზე, აუციებლად გაცნობებთ.

კიდევ ერთხელ შეგახსენებთ, რომ დღეს დილიდან ვალეში სამხრეთ კავკასიური გაზსადენის გაფართოების სამუშაოებზე დასაქმებული 200–მდე მუშა იყო გაფიცული. ისინი ითხოვენ გაუზარდონ შემცირებული საათები, რის გამოც მათი ხელფასი 600–დან 400 ლარამდე შემცირდა, დაუმატონ ანაზღაურება შაბათ–კვირას მუშაობისთვის, ან ამ დღეებში დაასვენონ და გააუმჯობესონ მათი კვებითი მენიუ.

დღეს დილითვე კომპანიის დასაქმების სამსაახურის ხელმძღვანელმა 30 მუშას უთხრა, რომ სამსახურიდან გაათავისუფლეს. აქცია შუადღეს ისე დასრულდა, რომ მუშებთან არავინ გამოსულა. საღამოს უფროსთან სასაუბროდ გათავისუფლებულები შევიდნენ. რაზე ისაუბრეს უცნობია, თუმცა, საღამოს, 30–დან 19–ს აცნობეს, რომ სამსახურში აღარ აღადგენდნენ და დაცვის პოლიციის დახმარებით ის სასტუმროც დაატოვებინეს, სადაც ღამეს ათევდნენ. სასტუმრო კომპანიას აქვს დაქირავებული.

[ვარლამ წიკლაური, ნინო ნარიმანიშვილი, ახალციხე]