ვალეში გათავისუფლებული მუშები შესაძლოა გარდაბანში დაასაქმონ

„დღეს გვითხრეს, რომ ვინც ახალციხიდან გამოგიშვეს, მოდით და იმუშავეთო. ორშაბათს რა მოხდება არ ვიცით“,– ამბობს სამსახურიდან გათავისუფლებული კობა ნავერიანი.

19 გათავისუფლებული მუშიდან, უმეტესობა გარდაბნიდან არის, ნაწილი რუსთავიდან და თბილისიდან. 19–ვე საპროტესტო აქციების გამართვამდე ვალეში, სამხრეთ-კავკასიური გაზსადენის გაფართოების პროექტის სამუშაოებზე იყვნენ დასაქმებულები.

შეგახსენებთ, ვალეში, სამხრეთ-კავკასიური გაზსადენის გაფართოების პროექტის სამუშაოებზე დასაქმებული მუშები 2 დეკემბერს გაიფიცნენ. ისინი აპროტესტებდნენ სამუშაო საათების შემცირებას, რის გამოც მათი ხელფასი 600–დან 400–მდე შემცირდა, ასევე ითხოვდნენ კვების გაუმჯობესებას და ორმაგად ანაზღაურებოდათ შაბათ დღეს მუშაობა. აქციების მეორე დღეს, 19 მუშა სამსახურიდან გაათავისუფლეს და სასტუმროდანაც გაუშვეს.

საბოლოოდ, სამდღიანი აქციების შემდეგ, კომპანიის ხელმძღვანელობამ, მუშების მოთხოვნა დააკმაყოფილა. გაფიცულები დღეს,5 დეკემბერს, დილიდან თავიანთ საქმიანობას დაუბრუნდნენ.

[თინათინ ზაზაძე, ახალციხე]