ვალეში გაფიცულ მუშებს კომპანია მოლაპარაკებას სთავაზობს

გაფიცულ მუშებს კომპანიის წარმომადგენელი, ადამიანური რესურსების სპეციალისტი ილია ბეჟაშვილი შეხვდა.
„2–3 კაცი შემოდით და დაელაპარაკეთ ხელმძღვანელობას. შემდეგ გამოდით და ყველას გადაეცით მათი დანაბარები. შეთავაზებაა ასეთი, რომ ვისაც მუშაობის სურვილი აქვს შემოვიდეს და იმუშაოს. უფროსები ამბობენ, რომ მათ პრესასთან ურთიერთობა არ შეუძლიათ, მიზეზი შემოდით და თავად გაიგეთ“, – ამბობს ილია ბეჟაშვილი.

მუშები ხელმძღვანელობასთან შესვლას არ აპირებენ:“თვითონ მოვიდნენ და ყველაფერი ჟურნალისტებთან ერთად აგვიხსნან. ჩვენ დანებებას არ ვაპირებთ“, – აცხადებენ გაფიცულები.

მუშებს გზა აქვთ გადაკეტილი და საწვავით და ბეტონით დატვირთულ მანქანებს არ ატარებენ.
ადგილზე მობილიზებულია პოლიცია.

გაფიცულები სამცხე–ჯავახეთის გუბერნატორთან, აკაკი მაჭუტაძესთანაც ითხოვენ შეხვედრას, თუმცა უშედეგოდ, მათთან შესახვედრად გუბერნატორი ამ დრომდე არ მისულა.

შეგახსენებთ, რომ ვალეში სამხრეთ კავკასიური გაზსადენის გაფართოების სამუშაოებზე დასაქმებულმა მუშებმა აქცია გუშინ, 2 დეკემბერს დილიდან დაიწყეს და 15:00 საათამდე გაგრძელდა. გაფიცულები ითხოვენ გაუზარდონ შემცირებული საათები, რის გამოც მათი ხელფასი 600–დან 400 ლარამდე შემცირდა, დაუმატონ ანაზღაურება შაბათ–კვირას მუშაობისთვის, ან ამ დღეებში დაასვენონ და გააუმჯობესონ მათი კვებითი მენიუ.

გუშინვე, კომპანიის დასაქმების სამსახურის ხელმძღვანელმა 30 მუშას უთხრა, რომ სამსახურიდან გაათავისუფლეს. აქცია შუადღეს ისე დასრულდა, რომ მუშებთან არავინ გამოსულა. საღამოს უფროსთან სასაუბროდ გათავისუფლებულები შევიდნენ. რაზე ისაუბრეს უცნობია, თუმცა, საღამოს, 30–დან 19–ს აცნობეს, რომ სამსახურში აღარ აღადგენდნენ და დაცვის პოლიციის დახმარებით ის სასტუმროც დაატოვებინეს, სადაც ღამეს ათევდნენ. სასტუმრო კომპანიას აქვს დაქირავებული.

[ვარლამ წიკლაური, თინათინ ზაზაძე, ახალციხე]