ადიგენის გამგებელი: დერცელში არ ყოფილა ღვარცოფი, დაზიანდა გზის პატარა მონაკვეთი

ზაქარია ენდელაძეს „სამხრეთის კარიბჭე“ ტელეფონით ესაუბრა. როგორც გამგებელმა დაგვიდასტურა, დერცელში ნამდვილად იყო გუშინ უხვი ნალექი, რამაც მცირეოდენი დაზიანებები გამოიწვია. თუმცა, ინფორმაცია, რომ იყო დიდი მასშტაბის ღვარცოფი, რეალობას არ შეესაბამება.

„როგორც ასეთი, რომ ღვარცოფი იყო და საშინელება მოხდა, ასეთი მასშტაბის არ ყოფილა. დაზიანებულია რაღაც მონაკვეთები. კომისია უკვე ჩამოვიდა, შევხვდები და ხვალ დილას უკვე გვექნება მაქსიმალური ინფორმაცია გარემოებების შესახებ“, – განაცხადა გამგებელმა.

მისივე თქმით, როგორც კომისიის წევრებმა სატელეფონო საუბარში აცნობეს, დაზიანებულია დაახლოებით 5–7 მეტრი გზა: „ტექნიკით მისვლა შეუძლებელია და როგორც მე მეუბნებიან, ამას უნდა მუშახელი“.

ზაქარია ენდელაძე კატეგორიულად უარყოფს ერთ–ერთი ადგილობრივის მიერ „სამხრეთის კარიბჭესთვის“ ნათქვამს, რომ გამგებელმა მათ დახმარებაზე უარი უთხრა და განუცხადა თავად შეეკრიბათ ფული. გამგებელი ამბობს, რომ მომხდარის შესახებ დერცელში მას მისმა წარმომადგენელმა დღეს, 11:37 საათზე ტელეფონით აცნობა. რამდენიმე წუთში მასთან დარეკა დერცელის ერთ–ერთმა მცხოვრებმაც, რომელიც ითხოვდა, დაუყოვნებლივ შეეკეთებინათ გზა.

„ვუთხარი კომისია შეისწვალის ფაქტებს, ვნახავთ რა ხასიათის სამუშაოებან გვაქვს საქმე და ამის მიხედვით გავაკეთებთ–მეთქი. მითხრა, რომ ვერ დაელოდებოდა კომისიას, პროცედურებს, რომ ჩვენ დაუყოვნებლივ უნდა მოგვეხდინა რეაგირება. ვუთხარი, თუ ვერ მოიცდით ჩვენს მოსვალმდე, თქვენ გყავთ ტრაქტორი და ჩვენს მოსვლამდე შეგიძლიათ საკუთარი შესაძლებლობებით მიხედოთ–მეთქი“, – ამობს გამგებელი და გვიხსნის, რომ დერცელმა ტრაქტორი „სოფლის მხარდაჭერის პროგრამის“ ფარგლებში შეიძინა, – „მათ როგორ თქვეს, ნამდვილად ვერ გეტყვით. უბრალოდ, ეს არის რეალობა, თუ მე არ მელოდები, მაშინ შენ უნდა გააკეთო“.

ადიგენიდან დერცელამდე საათნახევრის გზაა, გაცილებით მეტია მთამდე, სადაც შემთხვევა მოხდა. გამგებელი ამბობს, რომ დროსა და ლოდინში სწორედ ამ პერიოდს გულისხმობდა.

ზაქარია ენდელაძის ინფორმაციით, ამ დროისთვის მთაში წყლის მიწოდება აღდგენილია. რაც შეეხება პრობლემის მოგვარებას, გამგეობას ზუსტი გეგმა ხვალ დილით ექნება.

„შევისწავლით ბოლომდე, ხვალ დილას გვეცოდინება რასთან გვაქვს საქმე და შევეცდებით მაქსიმალურად მოკლე ვადაში აღმოვფხვრათ პრობლემა“, – აცხადებს გამგებელი და ამატებს, რომ ეს კონკრეტული შემთხვევა მისი ვარაუდით სხვის მიერ იყო მართული ვინაიდან დერცელის მცხოვრებლებს გამგებელთან ცუდი ურთიერთობა არ აქვთ, – „მათ მოგვცეს ხმა, ახლა ჯერი ჩვენზეა და ვაკეთებთ, ვეხმარებით ყველაფერში“.

შეგახსენებთ, გუშინდელმა ძლიერმა წვიმამ და სეტყვამ დერცელის მთაში, სადაც დაახლოებით 200 ადამიანი ცხოვრობს, გზის მონაკვეთი დააზიანა. ადგილობრივებმა მოვლენას ღვარცოფი უწოდეს და ხელისუფლება უყურადღებობაში დაადანაშაულეს.

[ნინო ნარიმანიშვილი, ადიგენი]