ნათესების, ხეხილისა და შინაური ფრინველების გარეშე დარჩენილი ასპინძელები დახმარებას ითხოვენ

12 მაისს, ასპინძის მუნიციპალიტეტში მოსულმა ძლიერმა წვიმამ და სეტყვამ, დაბა ასპინძა და სამი სოფელი: ოთა, ოშორა და დამალა დააზარალა. დამალიდან წამოსულმა წყალმა დაბა ასპინძაში სასაფლაო და სახლები დატბორა, ოთის წყლის ადიდების გამო კი რამდენიმე საათით გადაიკეტა დაბა ასპინძის ცენტრალური მაგისტრალი. ადგილობრივები ამბობენ, რომ მსგავსი მასშტაბის სტიქია არ ახსოვთ.

„მოვარდა ადიდებული წყალი, გადმოვიდა გზებზე, ჩვენს კაფეშიც შემოვიდა. თავს ვუშველეთ, შენობიდან მაშველებმა გაგვიყვანეს, მაგრამ კედლები დასველდა, წყალმა ყველაფერი გააფუჭა“, – ამბობს დაბა ასპინძაში მდებარე კაფე „ევროპას“ თანამშრომელი ნინო ბერიძე.
წყალი შევიდა დაბა ასპინძაში მდებარე ცენტრალურ პურის საცხობშიც. თანამშრომლების თქმით, დაზიანდა შენობა, დასველდა რამდენიმე ტომარა ფქვილი და გაფუჭდა საცხობში მომარაგებული მარილი, ზეთი და საფუარი.

„რვა ტომარა ფქვილი, ორი ტომარა მარილი, ორი ხუთლიტრიანი ზეთი, ათი შეკვრა საფუარი – ყველაფერი გადასაყრელია. თუ რამე იყო, ყველაფერი გაფუჭდა, შენობაც შესაკეთებელია. გუშინ მაშველები დაგვეხმარნენ, შენობიდან წყალი ამოვტუმბეთ, ახლა ჩვენ თვითონ ვასუფთავებთ“, – გვეუბნება უფროსი მცხობელი ნოდარ ზურაბაშვილი.

სტიქიამ ადგილობრივების შინაური პირუტყვი და ფრინველი დახოცა. განადგურებულია ნათესები და ხეხილი.

„ორი გოჭი მყავდა ახალი ნაყიდი და წყალმა წაიღო“, – ამბობს ასპინძაში მცხოვრები ზურა თარხნიშვილი.

„28 წელია აქ ვარ და ასეთი რამე არ მინახავს, აქამდეც ადიდებულა ოთის წყალი, მაგრამ ასე რომ გაენადგურებინა ყველაფერი, არ მახსოვს. ორი ხბო დამეკარგა ამ სტიქიის დროს. მეზობლის ღორები და ქათმები მოყავდა წყალს“, – ამბობს ასპინძელი ირმა თარხნიშვილი.

„საღორე დაანგრია, სამი გოჭიც წყალმა წაიღო, 30 ფრთა ქათამი და 50 ცალი წიწილა წაიღო. ხიდი მოწყვიტა, რომლითაც იმ ნაკვეთს ვუკავშირდებოდით, რომელსაც ვამუშავებთ“, – ამბობს ასპინძის მკვიდრი თინა მელიქიძე.

სტიქიით დაზარალებულ ასპინძაში გუშინვე გაემგზავრასამცხე–ჯავახეთის გუბერნატორი აკაკი მაჭუტაძე. დღეს დილიდან, კი ასპინძის გამგეობაში გამართულ სპეციალურ სხდომაზე ოთხი სამუშაო ჯგუფი შეიქმნა, რომელიც სტიქიის შედეგებს შეისწავლის.

„ერთი ინფრასტრუქტურის მიმართულებით იმუშავებს, საცხოვრებელ სახლებს შეამოწმებენ. მეორე ჯგუფი დაბა ასპინძაში და სოფელ ივერიაში, სასოფლო–სამურნეო სავარგულების მდგომარეობას შეისწავლის. მესამე ჯგუფი სოფელ დამალაში იმუშავებს, სადაც მეწყრული პროცესებიც დაიწყო და სახლებს მიადგა ზიანი, ერთი ჯგუფი კი ოთასა და ოშორას აღწერს“, – განმარტავს ასპინძის მუნიციპალიტეტის გამგებლოს მოადგილე ალექსანდრე პაპაშვილი და ამატებს, რომ რამდენი ოჯახია დაზარალებული ამ დროისთვის ცნობილი არაა.

მისივე თქმით, ზარალის დამთვლელი კომისია მუშაობას ერთ კვირაში დაასრულებს. ამის შემდეგ გადაწყდება ვინ და რა ფორმით დაეხმარება დაზარალებულებს.

[თამარ თოთაძე, ასპინძა]