დერცელში სტიქიის შედეგად დაზიანებული გზის მონაკვეთი აღდგა

ადიგენის მუნიციპალიტეტის გამგეობაში აცხადებენ, რომ დერცელიდან მთამდე მისასვლელ გზაზე სარემონტო სამუშაოები დასრულდა.

„დღეს დილით შვიდ საათზე გავედით ადგილობრივ მოსახლეობასთან ერთად ჩვენ საკუთრებაში არსებული ტრაქტორით და იქ გზა გავაკეთეთ. სამუშაოებს უშუალოდ ჩემი პირველი მოადგილე ხელმძღვანელობდა“, – ამბობს ადიგენის მუნიციპალიტეტის გამგებელი ზაქარია ენდელაძე.

მისი განცხადებით, აქ გზის მცირე ნაწილი იყო დაზიანებული: „აჟიოტაჟი რაც მოჰყვა ამ ფაქტს, იყო თითიდან გამოწოვილი. დაახლოებით ხუთი–ექვსი მეტრი სიგრძის და სამი–ოთხი მეტრი სიგანის მონაკვეთი დაზიანდა. ამჟამად აქ ტრანსპორტით მოძრაობა ჩვეულებრივ შესაძლებელია“.

შეიკითხვებზე თუ რა დასკვნა დადო სპეციალურმა კომისიამ, რომელიც სტიქიის შემდეგ დერცელში მუშაობდა და რა დაუჯდა ადგილობრივ ბიუჯეტს ამ გზის მონაკვეთის შეკეთება, ენდელაძემ გვიპასუხა: „შესასწავლი აქ თითქმის არაფერი იყო. ეს დაახლოებით საწვავის ფასი დაგვიჯდა“.

მისივე განცხდებით, აღმოფხვრილია წყლის პრობლემაც. ამდროისთვის რეზინის მილებით ის დაზიანებული მონაკვეთი, რომელიც სტიქიის შემდეგ წყალმა წაიღო, ისევ გადაბმულია.

შეგახსენებთ, რომ ღვარცოფმა ადიგენის მუნიციპალიტეტის სოფელ დერცელის მთაში მისასვლელი გზა მოწყვიტა. შემთხვევას მსხვერპლი არ მოჰყოლია.

[თამუნა უჩიძე, ადიგენი]